येँ मनपापाखें होर्डिङ बोर्ड चिइकेगु शुरु
येँ- येँ महानगरपालिकां शहरी सुन्दरता हे करुप जुइकथं महानगरया थीथी थासय् तयातःगु होर्डिङ बोर्ड चिइकेगु प्रक्रिया न्ह्याकूगु दु । येँ मनपां थुकथं तयातःगु होर्डिङ बोर्ड, भित्तलेखन, अंगः अंगलय् तिकातःगु पोस्टर, पम्पलेट, पर्चा आदि चिइकेत सम्बन्धित संस्था, निकाय व व्यक्तियात निर्देशन बिउगु खः ।
येँ मनपां बिउगु निर्देशनयात बेवास्ता यायेवं येँ मनपां थम्हं हे उकथं तयातःगु होर्डिङ बोर्ड चिइकेगु ज्या न्ह्याकूगु खः । थीथी कम्पनी, उद्योग, कलकारखाना, व्यवसायया उत्पादन सम्बन्धी व मेमेकथंया तयातःगु होर्डिङ बोर्ड क्वःछिनातःगु इलय् तक नं चिइकेगु ज्या मयायेवं येँ मनपां सहरी सुन्दरता हे कुरुप जुइकथं तयातःगु धासें उकियात चिइकेगु शुरु याःगु खः ।
येँ मनपां बिउगु छवाःया ई दुने नं होर्डिङ बोर्ड चिइकेगु ज्या मजुइवं वंगु मंगलवाःनिसें न्हू बानेश्वर, कोटेश्वर, माइतीघर, त्रिपुरेश्वर, लैनचौर लगायतया थासय् च्वंगु अज्याःगु बोर्ड चिइकेगु ज्या न्ह्याकूगु खः । लिसें आः येँ मनपां पुतलीसतक, बागबजाः, पुलांगु बानेश्वर, कोटेश्वर, चाबही लगायतया थासय् होर्डिङ चिइकेगु ज्या न्ह्याकाच्वंगु दुसा वयां लिपा कलंकी, सीतापाइला, बालाजु, कालीमाति लगायत मेमेगु थासय् तयातःगु होर्डिङ बोर्डयात नं चिइका यंकेगु खँ न्ह्यथंगु दु ।
होर्डिङ बोर्ड, भित्तलेखन, पोस्टर पम्पलेट चिइकेगु ज्या मयाःगु धासें सर्वोच्च अदालतय् थ्व सम्बन्धय् येँ महानगरपालिका विरुद्ध अवहेलनाया मुद्दा दर्ता जूगु खःसा अदालतया आदेशकथं हे येँ मनपां थुगु ज्याय् थःगु सक्रियता क्यनाहःगु खः ।
२०७२ साल भदौ १६ गते सर्वोच्चया तात्कालीन प्रधानन्यायाधिश कल्याण श्रेष्ठ व न्यायाधिश ओमप्रकाश मिश्रया मंकाः इजलासं सहरया छेँ, पःखाः, मतया लठ्ठा लगायत गुगुं नं थासय् तयातःगु पोस्टर, पम्पलेट, भित्तेलेखन, अनधिकृत रुपय् तयातःगु होर्डिङ बोर्ड चिइेकत व हाकनं प्रयोग याके मबीत धासें आदेश बिउगु ख ः।
येँ मनपाया प्रवक्ता ईश्वरमान डंगोलयाकथं अज्याःगु प्रचार सामग्रीत चिइकेत सम्बन्धित संस्था, व्यक्ति व निकाययात छवाःया ई बिउगु खः । क्वःछिनातःगु इलय् सम्बन्धित व्यक्ति वा संस्थां उकियात चिइकेगु ज्या मजुल धाःसा येँ मनपा स्वयम थम्हं हे चिइकेगु व थुगु कारवाही अन्तर्गत जूगु खर्चया भार सम्बन्धित पक्षपाखें हे व्यहोरे याकेगु नं धाःगु दु ।
LEAVE YOUR COMMENTS