ढुंगानाया अन्त्येष्टि थौं याइगु
येँ (नेपालभाषा टाइम्स)- पुलांम्ह सभामुख लिसे मानव अधिकारवादी नेता दमननाथ ढुंगानाया अन्त्येष्टि थौं याइगु जूगु दु । वय्कः म्हिगः येँ वासः याकुयाकुं मदुगु खः । बेलायतय् च्वनाच्वंम्ह वय्कःया काय् लिहां वयेवं पशुपति आर्यघाटय् थौं १२ बजे अन्त्येष्टि याइगु जूगु दु । वय्कः स्येँला सम्बन्धी वासः यायेत पुलांगु बानेश्वरय् च्वंगु फ्रन्टलाइन अस्पतालय् भर्ना जुयाः वासः याकाच्वंगु खः ।
८३ दँ दुम्ह मदुम्ह ढुंगाना २०४८ सालय् येँया क्षेत्र नम्बर २ पाखे निर्वाचित जुयादीगु खःसा २०५१ साल तक सभामुख जुयादीगु खः । वय्कलं सभामुखया रुपय् म्हितूगु भूमिकायात नेपाःया राजनीतिइ आः नं लुमंकेगु याः । वय्कलं सरकार सत्तापक्षया खःसा संसद प्रतिपक्षया खः धासें उगु इलय् प्रमुख प्रतिपक्षी पार्टीयात सदनय् विशेष महत्व बियादीगु खः ।
लिसे वय्कलं मदुम्ह मानव अधिकारवादी नेता पद्मरत्न तुलाधर लिसे जानाः देशय् न्ह्यानाच्वंगु सशस्त्र द्वन्द्वयात शान्तिपूर्ण रुपं क्वचायेकेगु निंतिं सहजकर्ताया भूमिका नं म्हितादीगु खः । २०६२÷६३ सालय् जूगु जनआन्दोलनय् नागरिक समाजया न्ह्यलुवा जुयाः नं
वय्कलं थःगु भूमिका म्हितादीगु दु ।
मदुम्ह ढुंगाना पञ्चायत कालय् विद्यार्थी संगठनं राजनीति न्ह्याकादीगु खः । वय्कलं ताः ई तक वकालत पेशायात नं न्ह्याकादीगु खः । वय्कः भूमिगत कालय् नीस्वंगु नेपाल विद्यार्थी संघया संस्थापक अध्यक्ष नं खः ।
LEAVE YOUR COMMENTS