सार्वजनिक यातायात जोखिमपूर्ण

येँ (नेपालभाषा टाइम्स) – लिपांगु इलय् सार्वजनिक यातायातया यात्रा जोखिमपूर्ण जुजुं वंगु दु। कोरोना भाइरस (कोभिड-१९) संक्रमणया जोखिम कायम हे जुयाच्वंगु अवस्था सार्वजनिक यातायातया यात्रा नं जोखिमपूर्ण जूगु खः । निषेधाज्ञा छ्वासुकूगुयालिसें सार्वजनिक यातायात नं संचालन याके बीगु निर्णयलिसें अज्याःगु सवारी साधनया यात्रां जोखिम अप्वयेकूगु जक मखु, संक्रमण भयावह जुइगु स्थिति तकं ब्वलंगु दु ।

जिल्ला प्रशासन ज्याकुथिया निर्देशन व यातायात व्यवस्था विभागं तयार याःगु स्वास्थ्य सुरक्षा मापदण्ड पूर्णरुपं पालना मजुइवं सार्वजनिक यातायातया यात्रा जोखिमपूर्ण जूवंगु खः । विभागं तयार याःगु मापदण्डकथं छगू लहरय् छम्ह जक च्वनेगु, सवारी साधनय् अनिवार्य रुपय्स्या निटाइजरया व्यवस्था जुइमाःगु व्यवस्था याःसां उकिया पूर्णरुपं पालना यायेगु व कार्यान्वयन यायेगु ज्या जुयाच्वंगु मदु ।

सम्बन्धित निकायपाखें अनुगमन यायेगु ज्या मजुयाच्वंगुलिं व्यवसायीतय्सं नं मापदण्डयात बेवास्ता यानाः सवारी साधन संचालन यानाच्वंगु दु। सार्वजनिक यातायातया साधनं पूर्ण क्षमताय् बछि जक यात्रु तयाः स्यानिटाइजर व्यवस्था यानाः यातायात संचालन यायेमाःगु व बछि जक यात्रु तये बलय् न्हापा कया वयाच्वंगु भाडाय् ५० प्रतिशत थप भाडा काये दइगु व्यवस्था याःगु खः । भाडाय् नं एकरुपता वयामच्वंगु यात्रुतय्सं धाःगु दु ।

उखे विभागया महानिर्देशक गोगन बहादुर हमालं मापदण्ड पालना याः मयाः धइगु बारे अनुगमन यायेगु जिम्मा ट्राफिक प्रहरीयात बियागु कनादिल ।