येँ मनपां विक्रमया छेँजःयात आर्थिक ग्वाहालि बीगु

येँ (नेपालभाषा टाइम्स) – येँ महानगरपालिकां मेट्रो एफएमया पत्रकार विक्रम शाक्यया छेँजःयात आर्थिक ग्वाहालि याइगु जूगु दु । येँ मनपाया आः नकतिनि क्वचाःगु ५४ क्वःगु कार्यपालिकाया बैठकं मदुम्ह पत्रकार शाक्यया छेँजःयात आर्थिक ग्वाहालि उपलब्ध याकेगु निर्णय याःगु खः । येँ मनपा संचार विभाग अन्तर्गतया मेट्रो एफएमय् कार्यरत जुयाच्वंगु हे अवस्थाय् वंगु असोजय् ४९ दँया उमेरय् शाक्य मदुगु खः । कार्यपालिकाया बैठकं मदुम्ह शाक्यया छेँजःयात छगू लख तका आर्थिक ग्वाहालि उपलब्ध याकेगु निर्णय याःगु खः ।

येँ मनपाया प्रमुख विद्यासुन्दर शाक्यया अध्यक्षताय् च्वंगु कार्यपालिकाया उगु बैठकं ‘बजाः व्यवस्थापन व अनुगमन विधेयक-२०७७’ पारित यायेगु नापं नरःया सांस्कृतिक संरक्षणया निंतिं अक्षय कोष संचालन यायेगु सम्बन्धी कार्यविधि नं तर्जुमा यायेत सैद्धान्तिक सहमति बिउगु दु ।

थुकथं हे कमलपुखू पुनःनिर्माण, वडा नं. ५ स्थित गोरखनाथ पुनःनिर्माण व वडा नं. २५ स्थित ओलाछेँ त्वाः छेँया पुनःनिर्माणया म्याद थप यायेगु नं निर्णय याःगु दु ।