कल्पनाया ‘छंगु लँ स्वयाच्वंगु मिखा’ म्येँया म्युजिक भिडियो पिदन

थिमि- म्येँ हालामि कल्पना श्रेष्ठया सलय् दुथ्याःगु छपु म्येँया म्युजिक भिडियो पिहां वःगु दु । म्येँ हालामि श्रेष्ठया ‘छंगु लँ स्वयाच्वंगु मिखा’ बोलया म्युजिक भिडियो आः नकतिनि प्रिमियर जूगु खः ।

मध्यपुर थिमि नगरपालिकाया प्रमुख मदनसुन्दर श्रेष्ठं उगु म्युजिक भिडियोया प्रिमियर यानादीगु खः । ज्याझ्वलय् नवासें नगरप्रमुख श्रेष्ठं नगर दुने न्हू पुस्ताया कलाकारत पिहां वःगु खनाः थः तसकं लय्ताःगु खँ कनादिल । लिसें वय्कलं नगरपालिकां कलाकारतय् प्रतिभा पित हये मखं धकाः आशां द्याकाः च्वनेमालीगु अवस्था मवयेमा धासें कलाकारिता ख्यःया निंतिं फक्व ग्वाहालि यायेगु प्रतिबद्धता नं प्वंकादिल ।

कलाकारं कला ख्यः, कासामिं कासा ख्यलं मध्यपुर थिमिया इज्जत तयेगु ज्या यानाच्वंगु धासें अज्याःपिं प्रतिभायात ग्वाहालि यायेगु जनप्रतिनिधिया नं दायित्व जूगु धयादिल । पाहांकथं झायादीपिं वडा नं ९या वडाध्यक्ष इन्द्रबहादुर प्रजापति, ईलोहं प्रकाशनया प्रबन्ध निर्देशक नरेशवीर शाक्य, सिने पत्रकार विजयरत्न असंबरे, नेपाली कांग्रेस नगर सभापति सुरेन्द्र श्रेष्ठ, राष्ट्रिय नाचघरया वरिष्ठ कार्यक्रम प्रमुख प्रभाकर शर्मा, युवा व्यवसायी रत्न प्रजापति लगायतं नुगःखँ तयादीगु खः ।

नांजाःम्ह साहित्यकार शशिकला मानन्धरं लसकुस यानादीगु ज्याझ्वलय् म्युजिक भिडियोया समीक्षा सिने पत्रकार असंबरें यानादीगु खः । म्युजिक भिडियोया छाँयाकनं व सम्पादन मनोजरत्न शाहीं यानादीगु खःसा निर्देशन राजन शाहीं यानादीगु खः । म्युजिक भिडियोय् रविन्द्र शाही, रेश्मी महर्जन, म्येँ हालामि श्रेष्ठ लगायतं अभिनय यानादीगु दु । उगु म्येँ दर्शनवीर शाक्यं च्वयादीगु खःसा विजय कायस्थं लसय् हनादीगु खः। अथे हे संगीत संयोजन जुगल डंगोलं यानादीगु खः ।