नक्साय् लिम्पियाधुरा तयेत माग
भारतीय नक्साया मामिला नेपाःया अदालत थ्यन
येँ – नेपाःया नापी विभागं जारी याःगु नेपाःया राजनीतिक नक्साय् लिम्पियाधुरा नं दुथ्याकेमाःगु माग यासें सर्वोच्च अदालतय् म्हिगः रिट दायर जूगु दु । भूमि व्यवस्था, सहकारी तथा गरिबी निवारण मन्त्रालययात विपक्षी दयेकाः पाटन क्याम्पसया उपप्राध्यापक फणीन्द्र नेपाल व अधिवक्ता सुजित केसीं मंकाः कथं रिट तयादीगु खः ।
आः छ्यलाच्वंगु नेपाःया नक्साय् लिम्पियाधुरा दुथ्यानाच्वंगु मदुगुलिं उगु नक्सायात बदर यानाः पश्चिमपाखे लिम्पियाधुरा तकया जमिनयात अंकन यानाः नक्सा दयेकेत आदेश बीत रिटय् माग यानातःगु दु । रिट निवेदनय् धयातःगु दु, ‘नेपाः–भारत दथुइ जूगु सुगौली सन्धी कथं नेपाःया कालापानी, लिपुलेक व लिम्पियाधुरा नेपाःया भूभाग धकाः च्वयातःगु दु, उगु भूभाग अतिक्रमण जुइगु धइगु सुगौली सन्धिया अःखः खः ।’
रिट निवेदनय् नेपाःया भूभाग १,४७,१८१ वर्ग किमी दु । वर्तमान नक्साय् लिम्पियाधुराया जमिन कःमघाःगुलिं नेपाःया क्षेत्रफल म्हो जूगु जुइफु धासें जमिनया रक्षा यायेत नं अन्तरिम आदेशया माग याःगु दु ।
नेपाःया संविधानय् ‘नेपाःया स्वतन्त्रता, सार्वभौमसत्ता, भौगोलिक अखण्डता, राष्ट्रियता, स्वाधीनता, स्वाभिमान, नेपाःमिया हकहितया रक्षा, सिमानाया सुरक्षा, आर्थिक समुन्नति व समृद्धि नेपाःया राष्ट्रिय हितया आधारभूत विषय जुइ’ धयातःगु जूसां उकथं सरकारं ध्यान मबिउगु खँ रिटय् न्ह्यथनातःगु दु ।
संवैधानिक परिषदय् भाग विवाद
येँ – देशय् ब्वलनाच्वंगु राजनीतिक अन्यौलया दथुइ म्हिगः सःतूगु संवैधानिक परिषदया बैठक अन्तिम इलय् वयाः हानं स्थगित जूगु दु । बैठकय् ब्वति कायेत प्रमुख प्रतिपक्षी दलया नेता शेरबहादुर देउवा बालुवाटारय् थ्यनेधुंकूगु खः । तर बालुवाटारं धाःसा तयारी मगाःनि धासें बैठक स्थगित याःगु खँ धाःगु दु ।
उकथं हे संवैधानिक परिषदया दुजः लिसें प्रधानन्यायाधीश चोलेन्द्र शम्शेर राणा, उपसभामुख शिवमाया तुम्बाहाम्फे व राष्ट्रियसभाया अध्यक्ष गणेश तिमिल्सिना नं परिषद्या बैठकय् ब्वति कायेत बालुवाटार थ्यंगु खः । म्हिगःया परिषद बैठकं अख्तियार दुरुपयोग अनुसन्धान आयोग व निर्वाचन आयोगय् रिक्त जूपिं आयुक्तत नियुक्ति यायेगु कार्यसूची दयेकातःगु खः ।
अथे हे प्राकृतिक स्रोत तथा वित्त आयोगया दुजः, महिला आयोगया अध्यक्ष व सदस्य, राष्ट्रिय दलित आयोगया अध्यक्ष व सदस्य, राष्ट्रिय समावेशी आयोगया अध्यक्ष व सदस्य व आदिवासी जनजाति आयोगया अध्यक्ष व सदस्यत नियुक्त यायेगु समेत कार्यसूची दयेकातःगु खः ।
म्हिगःया बैठकय् नियुक्त जुइमाःपिं पदाधिकारीतय्गु सम्बन्धय् राजनीतिक दलतय् दथुइ भागबन्डा मिले मजूगुलिं बैठक स्थगित जूगु खँ सूत्रं धाःगु दु ।
LEAVE YOUR COMMENTS