ने. सं. ११४६ अनलागा अष्टमी -

आन्दोलनयात सांसद डा. शाक्यया ऐक्यवद्धता

येँ – प्रदेश ३ या नेकपा सांसद डा. अजयक्रान्ति शाक्यं गुथि विधेयक विरुद्ध थौंकन्हय् जुयाच्वंगु आन्दोलनय् थःगु ऐक्यवद्धता प्वंकादीगु दु । थःपिं संसदीय ज्याया कारणं पिने जिल्लाय् लानाच्वंगु खःसां येँय् जुयाच्वंगु आन्दोलनय् थःगु ऐक्य– वद्धता दुगु खँ वय्कलं ‘नेपालभाषा टाइम्स’ यात कनादीगु दु । सरकारं स्वनिगःया नेवाःतय्गु गुथि प्रणाली बारे खँ हे मथुइक विधेयक हःगु जुयाः उकियात छुं नं कथं कार्यान्वयन याके मजिउगु खँ नं वय्कलं कनादीगु दु । सम्बन्धित सरोकारवालातलिसे संवाद यानाः जक विधेयकयात पूर्णता बीगु लागिं नं वय्कलं इनाप यानादीगु दु ।