बादलया कलाः सञ्चार मन्त्री

येँ –  कामचलाउ सरकारं मन्त्रिपरिषद् विस्तार याये दइमखु धकाः लाःगु मुद्दाय् सर्वोच्च अदालतं अन्तरिम आदेश मबिइवं प्रधानमन्त्री केपी ओलीं बिहिवाः मन्त्रिपरिषद् विस्तार यासें पूर्णता बिउगु दु । थ्व झ्वलय् पुलांम्ह गृहमन्त्री रामबहादुर थापा बादलया कलाः नैनकला थापायात सञ्चार मन्त्री दयेकूगु दु । सर्वोच्च अदालतं सांसद मखुपिंत हाकनं मन्त्री दयेकेदइमखु धकाः आदेश बिइवं गृहमन्त्री जुयाच्वंम्ह रामबहादुर थापा लिसें माओवादी त्वःताः मन्त्री जुयाच्वंपिं न्हय्म्हेसित ओली अल्पमतया सरकारय् दुमथ्याकूगु खः । मन्त्री पद मदयेधुंकाः एमालेय् थःगु भविष्य मखनाः हाकनं माओवादीइ हे लिहां वनेत स्वयाच्वंपिं थुपिं नेतातय्त लय्तायेकेत प्रधानमन्त्रीं बादलया कलाः थापायात मन्त्री दयेकूगु खँ प्रधानमन्त्रीलिसे सतिम्ह छम्ह नेतां धाःगु दु ।

माओवादी त्वःतूम्ह ज्वालाकुमारी साहयात नं कृषि मन्त्री दयेकूगु दु । साहं प्रदेश नं. २ लय् माओवादीपाखें त्यानाः प्रदेशसभा सदस्य जुयाच्वंम्ह खःसा एमालेय् वयेवं माओवादीं वय्कःयात पदमुक्त यानाबिउगु खः ।

प्रधानमन्त्री ओलीं बिहिवाः न्हय्म्ह मन्त्री व छम्ह राज्यमन्त्री थप यासें मन्त्रिपरिषद्यात पूर्णता बिउगु खः । ओलीं थ्व पालय् खगराज अधिकारीयात गृहमन्त्री दयेकूगु दु । गृहमन्त्रीइ ओलीलिसे तसकं सतिक दुम्ह महेश बस्नेतयात हइगु चर्चा दुगु खःसां गृहमन्त्रीइ राष्ट्रपति विद्या भण्डारीं नं चिउता कयाच्वंगुलिं अधिकारीयात हःगु खँ धाःगु दु । अधिकारी न्हापा संसदय् एमालेया प्रमुख सचेतक जुयाच्वंम्ह खःसा माओवादीलिसे एकता लिपा वय्कः जिम्मेवारविहीन जुयाच्वंम्ह खः ।

थ्व पालय् जनता समाजवादी पार्टीया महन्थ ठाकुर पक्षया राजकिशोर यादवयात उद्योग मन्त्री दयेकूगु दु । थुकिया लिसें मन्त्रिपरिषद््य् जसपाया च्याम्ह मन्त्री व निम्ह राज्यमन्त्री जूगु दु । थुपिं बाहेक न्हूगु मन्त्रिमण्डलय् नारदमुनी रानायात वनमन्त्री, गणेश पहाडीयात संघीय मामिला तथा सामान्य प्रशासनमन्त्री, मोहन बानियाँयात प्रधानमन्त्री तथा मन्त्रिपरिषद् कार्यालय मन्त्री जूगु दु । एमाले नेता योगश  भट्टराई लिसे सतिम्ह पहाडी न्हापा ओलीविरुद्ध माधव–झलनाथ पक्षय् वनाच्वंम्ह खः । तर प्रतिनिधि सभा विघटन खारेज याःगु विरुद्ध सर्वोच्च अदालतय् तःगु मुद्दाय् हस्ताक्षर मयासे हाकनं ओली पक्षय् वःम्ह खः ।

सम्बन्धित बुखँ

LEAVE YOUR COMMENTS