ने. सं. ११४३ ञलागा चौथी -

हेमकृष्ण कुमारी स्मृति मिसा सम्मान लःल्हात

दोलखा (नेपालभाषा टाइम्स) – मेहरमान फाउण्डेशनया ग्वसालय् जूगु छगू ज्याझ्वःया दथुइ ‘हेमकृष्ण कुमारी प्रधान स्मृति मिसा सम्मान राष्ट्रिय सिरपाः-२०७६’ लःल्हाःगु दु । सिरपाः थगुने हे लःल्हायेमाःगु खःसां कोरोनाया कारणं लिज्याः वंगु खः ।

नेपाल पत्रकार महासंघ दोलखा जिल्लाया वार्षिक साधारणसभाया अवसर लाकाः महासंघया नवनिर्मित भवनय् जूगु ज्याझ्वलय् उगु सिरपाः लःल्हाःगु खः । उगु सिरपाः फाउण्डेसनया अध्यक्ष टिकानारायण प्रधान, ज्याझ्वःया मूपाहां नेपाल पत्रकार महासंघया उपाध्यक्ष व सिरपाःया दाता वरिष्ठ अधिवक्तालिसें पुलांम्ह महान्यायाधिवक्ता मुक्ति प्रधानं मंकाःकथं रातो पाटी डटकम टेलिभिजनया मीनाकुमारी यादवयात लःल्हाःगु खः । सिरपाःया राशी नीन्याद्वः तकाया खः ।

ज्याझ्वलय् दोलखाया प्रमुख जिल्ला अधिकारी लक्ष्मणविक्रम थापा, भिमेश्वर नगरपालिका प्रमुख भरतबहादुर के.सी., नेपाल पत्रकार महासंघया पुलांम्ह महासचिव ओम शर्मा, संचार मन्त्रालयया विज्ञ राजेन्द्र मानन्धर लगायतं नुगःखँ तयादीगु खः । पुलांम्ह महान्यायाधिवक्ता मुक्ति नारायण प्रधानं थः मां हेमकृष्ण कुमारि प्रधानया लुमन्तिइ वय्कःया पुण्य तिथिया दिंकुन्हु लःल्हायेकथं २०७१ सालय् उगु सिरपाः नीस्वनादीगु खः । पत्रकार महासंघया संयोजनय् फाउण्डेसनपाखें लःल्हायेगु याना वयाच्वंगु सिरपाःया निंतिं न्यागू लख तका दांया अक्षय कोष चायेकातःगु दु ।