राजोपाध्याय समाजया तःमुँज्या क्वचाल

ख्वप (नेपालभाषा टाइम्स)- स्वनिगःया आदिवासी ब्रम्हूकथं म्हसीका दुपिं द्यःब्रह्मू राजोपाध्यायतय् कुसा संगठन राजोपाध्याय समाजया तःमुँज्या क्वचाःगु दु । तःमुँज्या हाकनं छक्वः संजय शर्मा राजोपाध्यायया नेतृत्व न्हूगु ज्यासना पुचः ल्यःगु दु । नायः पदय् निर्विरोध निर्वाचित जूगु घोषणा जुइधुंकाः सभाय् न्ववासें राजोपाध्यायं आधुनिक प्रविधियात नं आत्मसाथ यासें समाजया धर्म, संस्कृति, परम्पराया संरक्षण, सम्वद्र्धन व प्रवद्र्धनय् न्ह्यज्यायेगु धयादिल । ‘झीगु मौलिक धर्म, संस्कृति, परम्परा ल्यंकेगु खःसा न्हूगु पुस्ताय् हस्तान्तरण जुइमाल ।

प्रविधिइ अभ्यस्त ल्याय्म्ह पुस्तायात आकर्षित यायेत झीगु धर्म, परम्परायात नं प्रविधिलिसे स्वानायंकेमाः’ समाजया नवनिर्वाचित नायः राजोपाध्यायं धयादिल । व्यक्तिगत वा पारिवारिक भावना स्वयां समाजया भावनायात प्राथमिकताय् तसें सकलें छधी जुयाः समाजया उत्थानय् जायेत राजोपाध्यायं इनाप यानादिल ।

अधिवेशनं निर्विरोध निर्वाचित याःगु झिंस्वम्ह दुजः दुगु कार्यसमितिया निम्ह न्वकुलिइ रचना शर्मा राजोपाध्याय व संचारकर्मी बिराजकाजी राजोपाध्याय, ल्यू छ्यान्जेय् बन्दना शर्मा राजोपाध्याय, छ्याञ्जेय् विजयशर्मा राजोपाध्याय, दांभरिं उद्धव आचार्य राजोपाध्याय व व ल्यू दांभरि चेतनादेवी शर्मा राजोपाध्याययात ल्यःगु दु । अथेहे कार्य समितिया खुम्ह दुजलय् बिरु सुवेदी राजोपाध्याय, किशोर शर्मा राजोपाध्याय, महेशबाबु शर्मा राजोपाध्याय, त्रिलोचन राजोपाध्याय, श्रीमणिराज शर्मा राजोपाध्याय व गिरिश शर्मा राजोपाध्याययात ल्यःगु दु । निम्ह दुजः कार्यसमितिं मनोनित याइगु समाजं न्ह्यथंगु दु ।

थ्वयां न्ह्यः अधिवेशनया उलेज्याझ्वलय् प्रा.डा. पुरुषोत्तम लोचन श्रेष्ठ, नेपाल प्रज्ञा प्रतिष्ठानया प्राज्ञ अगिब बनेपाली, यल नेवाः समाजया नायः विनोद ताम्रकार, ज्योतिषाचार्य बीरेन्द्र प्रसाद कायस्थं नेवाः समाजया सनातन धर्म संस्कृति परम्पराया संरक्षण यायेत राजोपाध्याय समाजया भूमिका महत्वपूर्ण जुइगु खँय् बः बिसें थःथःगु नुगःखँ तयादीगु खः । व्याकरणाचार्य गजानन्द राजोपाध्यायं नेवाः समाजया सनातन धर्म परम्पराया दर्शन, इतिहास बांलाक थुइकेत व ल्यंकेत संस्कृत अध्यनय यायेमाःगु बिचाः तयादिल । राजोपाध्याय समाजया निवर्तमान नायः अमरराज शर्मा राजोपाध्याय व संस्थापक नायः बदन ज्वालानन्द राजोपाध्याय, रचना शर्मा राजोपाध्यायं समाजया उत्थान यायेत सकलें संगठित जुइगु आवश्यक दु धासें सकल राजोपाध्यायतय्त संस्थाय् आवद्ध जुयाः नापनापं न्ह्याःवनेत इनाप यानादिल ।

उगु हे ज्याझ्वलय् वंगु २०७८ श्रावणनिसें २०७९ असारतक येँ, यल, ख्वपय् स्वथासं जूगु पञ्चाभिषेक रुद्री पाठ ज्याझ्वः, २०७९ श्रावणय् जूगु अयुताहुती यज्ञ ज्याझ्वलय् ग्वाहालि याःपिं ग्वाहालिमि, २०७८ व २०७९ सालया एस.इ.इ. परीक्षाय् ताःलाःपिं राजोपाध्याय विद्यार्थीतय्त सम्मान याःगु खःसा समाजंं ग्वसाः ग्वःगु म्ये कासा ‘गायन प्रतिभाको खोजी’इ उत्कृष्ट जूपिंत सिरपाः नं लःल्हाःगु खः । अथेहे, समाजया येँ जिल्ला समन्वय समितिं न्ह्याकूगु संस्कृत कक्षाया प्रशिक्षार्थीतय्त दसिपौ नं लःल्हाःगु खः । ज्याझ्वलय् समाजं प्रकाशन याःगुलिसें मेमेगु सफूया ब्वज्या नं जूगु खः ।