प्रा. माणिकलाल श्रेष्ठया अन्त्येष्टि

येँ – वाम बुद्धिजीवी, वरिष्ठ समालोचक प्राध्यापक माणिकलाल श्रेष्ठया अन्त्यष्टि थौं बिहिवाः जुल । येँया शोभा भगवति कर्णदिपय् वय्कःया सीम्ह वय्कःया तःधिकम्ह काय मलखलाल श्रेष्ठं मि तयादीगु खः । मि तये न्ह्यः वय्कःया सीम्हय् शिक्षा मन्त्री कृष्णगोपाल श्रेष्ठ व पुलांम्ह सभामुख सुवास नेम्वाङं नेपाःया ध्वाँय् फायेकादीगु खः ।

प्रा. श्रेष्ठया अन्तिम श्रद्धाञ्जली देछायेत नेपालभाषा ख्यःया न्ह्यलुवाःपिं नेपालभाषा मंकाः खलःया नायः दुर्गालाल श्रेष्ठ, मल्ल के सुन्दरपिं लिसें यक्व हे नेता–कार्यकर्ता कर्णदिपय् थ्यंगु खः । वय्कःया सीम्ह नेवाः देय् दबूया ध्वाँय् नं फायेकूगु खः । देय् दबूया नायः नरेश ताम्राकार व पुलांम्ह नायः मल्ल के सुन्दरं दबूया ध्वाँय् फायेकादीगु खः । अथेहे प्रा. श्रेष्ठयात श्रद्धाञ्जली देछायेगु निंतिं पुलांम्ह प्रधानमन्त्री लिसें जनता समाजवादी पार्टीया नेता बाबुराम भट्टराई, नेकपा माओवादी केन्द्रया नेता नारायणकाजी श्रेष्ठपिं नं थ्यंगु खः ।

प्रा. श्रेष्ठया अन्त्येष्टि न्ह्यः वय्कःया सीम्ह बिहिवाः हे सुथय् ११ बजे निसें थँहितिइ च्वंगु वय्कःया पुलांगु छेँय् अन्तिम दर्शनया निंतिं तःगु खः । थँहितिइ च्वंगु पुलांगु छेँनं गाडी तयाः लुतिइ यंकूगु खःसा लुतिं हे सीम्ह उठे यानाः कर्णदिप तक सिथं यंकूगु खः । वय्कःया सीम्हयात वय्कःया छय्पिंसं कुबिउगु खः ।

प्रा. श्रेष्ठ मंगलवाः सुथय् वासः याकुयाकुं अस्पतालय् मदुगु खः । वय्कःया काय जर्मनीं लिहां वयेवं बिहिवाः अन्त्येष्टि याःगु खः ।