सर्वोच्चय् नेम्बाङया चर्चा

येँ (नेपालभाषा टाइम्स) – नेकपाया उपनेता लिसें संविधानसभाया अध्यक्ष सुवास नेम्बाङ वर्तमान राजनीतिक अवस्था बार मौन च्वनाच्वंसां वय्कलं न्ववाःगु धकाः छुं न्हि न्ह्यवंनिसें सामाजिक सञ्जालय् भाइरल जुयाच्वंगु वय्कःया भाषण बारे धारे सर्वोच्च अदालतय् नं चर्चा जूगु दु ।

संसद पुनर्स्थापनाया माग यासें सर्वोच्च अदालतय् लाःगु रिटय् निवेदकया पक्षं म्हिगः बहस यासें अधिवक्ता दीनमणि पोखरेलं नेम्वाङं न्ववाःगु विषययात प्रमाणया रुपय् कयाः संसद पुनर्स्थापना यायेमाःगु जिकिर यानादीगु खः । बहसया झ्वलय् अधिवक्ता पोखरेलं छुं विशेष मौकाय् प्वंकूगु खँयात नं अदालतं प्रमाणया रुपय् काये फइगु कानुनी व्यवस्था कथं नेम्वाङं संसद सचिवालयया स्मारिकाय् उगु खँ धयादीगुलिं उकियात प्रमाणया रुपय् अदालतं कायेमाःगु माग नं इजलासय् यानादीगु खः ।

वय्कलं अन्तर्वार्ताया रुपय् छापे जूगु नेम्वाङया धापू समेत इजलासय् न्यंकादीगु खः । वय्कलं धयादिल, ‘श्रीमान, मौकाय् व्यक्त याःगु खँयात नं झीसं प्रमाणया रुपय् कायेमाः, तत्कालीन संविधानसभाया अध्यक्षं विगतया सिबें वर्तमान संसदीय प्रणाली बिस्कं जूगु जुयाः प्रधानमन्त्रीं संसद विघटन याये फइ मखु धकाः बियादीगु अभिव्यक्तियात प्रमाणया रुपय् कायेमाः ।’

अधिवक्ता पोखरेलं नेम्वाङं उगु खँ व्यक्तिगत रुपय् मखुसें संविधानसभाया अध्यक्षया हैसियतं नं न्ववानादीगु जूगुलिं उकियात गम्भीरतापूर्वक कायेमाःगु जिकिर यानादीगु खः । वंगु असार महिनाय् पत्रकारतलिसे धौख्यलय् जूगु छगू ज्याझ्वलय् नेम्वाङं आःया संविधान कथं प्रधानमन्त्रीं थ यत्थे प्रतिनिधिसभा विघटन याये फइ मखु धकाः स्पष्ट रुपं धयादीगु भिडियो वंगु छुं न्हि न्ह्यवंनिसें भाइरल जुयाच्वंगु खः । नेम्बाङ थम्हं धाःसा उगु धापू थःगु हे खःसां आःया सन्दर्भ धाःसा अबलय् सिबें पाःगु खँ धायेगु यानाच्वंगु दु ।

सम्बन्धित बुखँ

LEAVE YOUR COMMENTS