जापानय् नेवाः संस्कृतिया ब्वज्या

येँ – जापानय् च्वनाच्वंपिं नेवाःतय् संस्था नेवाः खलःया ग्वसालय् नेवाः संस्कृतिया ब्वज्या जूगु दु । खलःया ग्वसालय् नेवाः कला, संस्कृति, रहन सहनया प्रवद्र्धन यायेगु नापं जापानी संस्कृतिलिसे एकाकार यायेगु उद्देश्यं उगु सांस्कृतिक ब्वज्या याःगु खः । नेवाः खलः जापानया नायः प्रकाशलाल श्रेष्ठं बियादीगु जानकारी कथं वंगु मंगलवाः जूगु ब्वज्याय् नेवाः लोक प्याखं, नेवाः वसः, नेवाः सांगीतिक व सांस्कृतिक बाजंलिसें समय्बजि ज्वलंया नं ब्वज्या याःगु खः ।

राजधानी टोकियोया रिङ्काइ उद्यानय् जूगु ब्वज्याय् जापानय् च्वनाच्वंपिं नेवाः समुदाययात एकतावद्ध यानाः सांस्कृतिक भेषभुषा सहित थीथीकथंया ब्वज्या याःगु खः । नेपाःया सांस्कृतिक, सामाजिक पहिचानयात जापानी नागरिक नापं अन च्वनाच्वंपिं नेपाःमि दथुइ परिचित याना तयेया निंतिं उकथंया ग्वसाः ग्वःगु खःसा ज्याझ्वलय् जापानय् च्वनाः थीथी पेशा व व्यापार व्यवसाय याना वयाच्वंपिं आपालं नेवाःतय् नं सहभागिता दुगु टोकियोय् ज्या यानाच्वंम्ह डा. बलराम श्रेष्ठं कनादिल ।

मूलतः थुगु ज्याझ्वः जापानय् च्वनाच्वंपिंत नेवाःतय् थीथी पक्षया बारे जानकारी बीगु उद्देश्यं ग्वसाः ग्वयागु खःसां आपालं जापानीतय्सं नं उगु ब्वज्या उत्सुकतापूर्वक अवलोकन याःगु नायः श्रेष्ठं कनादिल ।