कमलपोखरीइ गगन थापाया विरोध छाय् ?

येँ (नेपालभाषा टाइम्स) – येँया वडा नं. १ स्थित कमलपोखरी पुनर्निर्माण यायेगु ज्याय् सम्पदा अभियन्तातय्सं विरोध यायेवं उकी तुं सः मिले यानाः उगु क्षेत्रया सांसद गगन थापा समेत विरोधय् कुहां वःगु खनाः येँ महानगरपालिका अजू चाःगु दु ।

कमलपोखरी पुनर्निर्माण याये न्ह्यः येँ महानगरपालिकां सुझाव कायेगु लागिं तत्कालीन सांसद गगन थापायात समेत तःक्वःमछि थःगु ज्याकुथी सःताः अन्तरक्रिया याःगु खः । लिसें मनपां तयार याःगु कमलपोखरी सम्बन्धी डिजाइन व नक्सा समेत वय्कःयात क्यंगु खः । वय्कलं डिजाइन पाय्छि जू धायेधुंकाः तिनि मनपां अन निर्माणया ज्या न्ह्याकूगु खँ मनपा सूत्रं धाःगु दु। तर आः अभियन्तातय्सं कमलपोखरी निर्माणया विरोध यायेवं थापां उकिया बचाउ यायेगु पलेसा कमलपोखरी दयेकाच्वंगु मिले मजू धकाः येँ महानगरपालिकाया मेयरयात पौ छ्वया हःगु खनाः मनपाय् उगु डिजाइन तयार याःपिं इन्जिनीयरत अजू चायाच्वंगु खँ सीदुगु दु ।

मनपां अन निर्माण ज्या न्ह्याकूबलय् कमलपोखरीया जग्गाय् छेँ दनाः ज्या यानाच्वंपिं स्थानीय छगू क्लबं छेँ त्वःते मखु धकाः विरोध याःगु खः । वहे विरोधया सः तचाः जुजुं वनाः आः अभियन्तात नं उकी सहभागी जूवंगु अनुमान याःगु दु। कमलपोखरीइ कंक्रिटया पुखू दयेकीन धासें सम्पदा अभियन्तातय्सं निरन्तर विरोध कार्यक्रम यानाच्वंगु दु ।

शनिवाः अभियन्तातय्सं कमलपोखरीइ लः सुइधुंकाः ल्यं दुगु चा ख्वालय् पानाः विरोध प्रदर्शन याःगु खः । विरोध लिपा मनपां अन निरीक्षण यायेगु ज्या नं न्ह्याकूगु दु ।