येँया सीडीओलय् थीथी नपायात थीथी बार

येँ (नेपालभाषा टाइम्स) – येँया सीडीओ कार्यालयं छुं ई न्ह्यः स्थगित यानातःगु थीथी सेवा कंस आइतवाःनिसें हाकनं न्ह्याकीगु जूगु दु। कोरोना संक्रमणया जोखिम अप्वया वनेवं वंगु साउन २५ गतेनिसें सीडीओ ज्याकूया छुं सेवा स्थगित याःगु खः ।

येँया सीडीओपाखें म्हिगः छगू सुचं जारी यासें न्हूगु नागरिकता दयेकेगु, नागरिकताया प्रतिलिपि, नाबालक परिचयपत्र, राहदानी, हातहतियार दर्ता, पत्रपत्रिका, संस्थासंस्था दर्ता व नवीकरण सम्बन्धी सेवा आइतवाःनिसें चायेकेत्यनागु जानकारी बिउगु खः ।

आइतावाःनिसें थीथी सेवा बिउसां नं भिड मजुइकेगु निंतिं सेवाग्राहीयात स्थानीय तह कथं सेवा कायेत थीथी न्हि क्वःछिनातःगु दु। न्हूगु व्यवस्था कथं आः येँ महानगरपालिकाया निवासीतय्सं आइतवाः, मंगलवाः व बिहीवाः जक सीडीओ ज्याकूया सेवा काये फइ । उकथं हे किपू, नागार्जुन व चन्द्रागिरी नगरपालिकाया जनतां सोमवाः, बुढानिलकण्ठ, टोखा, कागेश्वरी मनहरा नगरपालिकाया जनतां बुधवाः व गोकर्णेश्वर, दक्षिणकाली, शंकरापुर व तार्केश्वर नगरपालिकाया जनतां शुक्रवाः जक सेवा काये फइ ।

अथे हे संस्था दर्ताया ज्या सोमवाः व बुधवाः जक जुइसा नवीकरण आइतवाः, मंगलवाः व बिहीवाः जक जुइ । पत्रपत्रिका, छापाखाना दर्ता व विधान संशोधनया ज्या शुक्रवाः जक जुइगु खँ नं सुचनय् न्ह्यथनातःगु दु। थ्व बाहेक शान्ति सुरक्षाया निवेदन व कानुन बमोजिम जुइगु मुद्दा सम्बन्धी ज्या, सरकारी कार्यालय व आयोजना लिसे सम्बन्धित समन्वय व सहलहया ज्या धाःसा छवाःयंकं सञ्चालन जुइगु खँ नं सुचनय् न्ह्यथनातःगु दु। लकडाउन छ्वासुकेगु सरकारया निर्णय लिसें सीडीओ पाखें थ्व सुचं नं वःगु खः ।