लानिपुखू पुनःनिर्माण सुरु

येँ – राष्ट्रिय पुनर्निर्माण प्राधिकरणं ऐतिहासिक लानिपुखू दयेकेगु ज्या न्ह्याःगु दु । प्राधिकरणं उपभोक्ता समिति नीस्वनाः लानिपुखू दयेकेगु शुरु याःगु खः । राष्ट्रिय पुनर्निर्माण प्राधिकरणया प्रमुख कार्यकारी अधिकृत सुशील ज्ञवालीं परम्परागत शैली, प्रविधि व निर्माण सामग्री छ्यलाः प्रताप मल्लकालीन शैलीइ लानिपुखूया पुनर्निर्माण जुइगु खँ धयादीगु लानिपुखू पुनर्निर्माण उपभोक्ता समितिया अध्यक्ष अजय स्थापितं प्राधिकरणं क्वःछिनातःगु मापदण्ड कथं विशेष ध्यान बियाः लानिपुखू दयेकेगु खँ कनादिल । +

लानिपुखू पुनर्निर्माण ज्याय् थौंकन्हय् पीम्ह मनू खटे जुयाच्वंगु दु । समितिं आवश्यकता कथं कालिगढया ल्याः अप्वयेकेगु खँ धाःगु दु ।
पुनर्निमाण प्राधिकरणं लानिपुखू लगायत उगु क्षेत्रय् दुगु पुरातात्विक संरचनाया व्यवस्थित व समन्वयात्मक ढंगं पुनर्निर्माण यायेगु निंतिं प्राधिकरणया दुजः डा. चन्द्रबहादुर श्रेष्ठया संयोजकत्वय् लानिपुखू पुनर्निर्माण अनुगमन तथा समन्वय समिति नं नीस्वंगु खः ।

लानिपुखूया बँ व पःखाः दयेकेगु ज्या उपभोक्ता समितिपाखें याइगु व लानिपुखुलिइ दुगु बालगोपालेश्वर देगः पुनर्निर्माण व सौदन्र्यकरणया ज्या निर्माण व्यवसायीपाखें यायेगु खँ प्राधिकरणं धाःगु दु ।