थःत जनता स्वयां च्वय् तायेकीपिं कम्युनिष्ट जुइ फइमखु ः श्रेष्ठ
येँ – समाजवादी पार्टी, नेपालया सहअध्यक्ष राजेन्द्र श्रेष्ठं जनता स्वयां थःत च्वय् तायेकीपिं कम्युनिष्ट जुइ हे फइमखु धयादीगु दु । राष्ट्रपति विद्यादेवी भण्डारीं संघीय संसदय् संबोधनया झ्वलय् ‘मेरो सरकार’ धकाः संबोधन याःगुयात कयाः नं आक्रोश प्वंकादिल । सहअध्यक्ष अध्यक्ष श्रेष्ठं उगु खँ रिपोर्टस् नेपालय् जूगु साक्षात्कारया इलय् धयादीगु खः ।
वय्कलं राष्ट्रपति भण्डारीं सरकारया नीति तथा कार्यक्रमयात संघीय संघीय संसदय् संबोधन यायेगु झ्वलय् मेरो सरकार धकाः संबोधन याःगुयात कयाः आक्रोश प्वंकादिसें धयादिल, ‘संविधानया धारा ६६ या उपधारा २ लय् राष्ट्रपतिपाखें सम्पदान याइगु दक्वं ज्याय् नेपाल सरकारया सिफारिस व सम्मतिं जुइगु व्यवस्था दु ।
थ्व ल्याखं वय्कलं मेरो सरकार मखु, नेपाल सरकार धायेमाःगु खः ।’वय्कलं केपी ओली नेतृत्वया सरकार राष्ट्रपति भण्डारीया सरकार खः ला धकाः नं न्ह्यसः तयादिल । ओलीप्रति कटाक्षयासें वय्कलं प्रधानमन्त्री ओलीं राष्ट्रपति भण्डारीयात सामन्ती युगया महारानी थें दयेकेत स्वःगु द्वपं बियादिसें कम्युनिष्ट खःसा व हे कथंया आचरण व्यवहार यायेमा धयादिल ।
छगू मेगु प्रसगंय् प्रतिनिधिसभाया सदस्य तकं जुयाच्वनादीम्ह वय्कलं नेतातय्सं संघीय गणतन्त्रया युगय् गज्याःगु संस्कृति कायम यायेगु धइगु खँय् विशेष ध्यान बीगु स्वयेमाः धयादिल । लिपांगु इलय् नेतातय् दथुइ सुनां गुलि किलोया स्वांमाः क्वखायेगु धइगु गलत संस्करया विकास जूगु खँय् चिउताः प्वंकादिसें जनसेवक जुइमाःपिं सांसदतय्त माननीय धकाः संबोधन यायेगु व्यवस्थायात चिइके माःगु धारणा तयादिल ।
सांसदतय्त संबोधन यायेबलय् गुगु पदय् निर्वाचित जूगु खः व हे कथं जक संबोधन याःसा गाः धासें वय्कलं धयादिल, ‘पूँजीवादी देय्या नक्कल याये मजिउ, सांसदतय्त माननीय धकाः ट्याग बीगु चिइकेमाः ।’उगु इलय् वय्कलं थःगु पार्टी संविधानं प्रत्याभूत याःगु पूर्ण प्रेस स्वतन्त्रताया पक्षय् दु धासें धारा १९ या संचारया हक व धारा २७ या सूचनाया हकया पक्षय् दृढतापूर्वक कुहां वयेगु स्पष्ट यानादिल ।
संविधानं हे प्रेस स्वतन्त्रता बारे स्पष्ट व्याख्या यानातःगु धासें थःपिंसं प्रेसयात कुण्ठित यायेत स्वइगु खँयात कयाः विरोध यायेगु जुइ धासें वय्कलं प्रेसयात नं मर्यादित जुइत व गलत समाचार सम्प्रेषण मयायेत इनाप यानादिल ।
LEAVE YOUR COMMENTS