ने. सं. ११४४ कौलाथ्व एकादशी - चालं

राजनीतिक तिकडम

थौंकन्हय्या नेपाःया राजनीतिक गतिविधि खनाः जितः सिनेमाया छगू लु लुमना वइ । मिखाया न्ह्यःने झलझल लुयाच्वनी । दृश्यया थाय् । मनोरोगीतय् अस्पताल । छगू कुनय् छम्ह ल्वगिं वा वयेकेगु राग हालाच्वनी । ‘मेघ मल्हार’ । मेगु कुनय् मेम्ह हावा स्यंम्ह वस्ताजं मि वा गायेकेगु तान त्वःताच्वनी । ‘दीपक राग’ । अथे हे थःथःगु बेसुरय् व बेतालय् ल्वगितय्सं थःथःगु क्रियाकलाप क्यनाच्वनी । ठीक अथे हे थौं नेपाःया राजनीतिइ प्रधानमन्त्रीं संसद भंग यानाः चुनावया लागि तयार जू धकाः हाँक बियाच्वनी ।

मेखेर नेकपाया मेगु पक्षं संसद पुनर्स्थापना जुइमाः, प्रधानमन्त्रीयाके संसद भंग यायेगु अधिकार मदु। चित्कार थ्वयेकाच्वनी । नेकपा एकता जुसेंलि निम्ह अध्यक्ष दथुइ पार्टीया धारणा, निर्णय, विषयय् छगू हे सुर, छगू हे ताल दयेमाःगु खः । तर थौं निम्हेसिया सुर, तालं निखे स्वयाः सदां थःथःगु सुर तालय् निम्हेसिनं प्रलाप यानाच्वनी । धाइ देय् व जनताया भाग्य देशय् संचालित राजनीतिं याइ । तर थौंया देय्या बेसुर, बेताल राजनीतिं जनतायात सुथां लाःगु राजनीति बी फइगु स्थिति मदु। स्वार्थं सत्तासिन पार्टी थौं निकू कुचा दले धुंकल । व्यावहारिक रुपं । गुगु आधिकारिक नेकपा खः । बेठेगान । औपचारिक रुपं नेकपा कुचा दःगु घोषणा मजूनि । नेकपा छगू हे तिनि । छगू हे थाय् । नेकपायात छगू हे याना तयेगु प्रण यानाः तेश्रो धारया कमरेड वामदेव गौतम चान्हय् निभाः त्वयेकेगु ध्यानय् च्वनेत्यंगु दु ।

थौंकन्हय् प्रम ओलीं संसद विघटन यानाः निर्वाचनया घोषणा याःगु ज्याया प्यखेरं विरोध जूगु दु। थ्व गैर संवैधानिक कदम खः । प्रमयाके संसद भंग यायेगु अधिकार मदु। च्वन्ह्याःपिं कानूनविदतसें ओलींया संसद भंग कार्ययात कुंखिउँगु दु। संसद पुनर्स्थापना जुइमाः । जुइ । कानूनविज्ञतय्धा पू न्यने दु। मेखेर प्रम ओलीजु थम्हं कयागु संसद विघटनया पलाः पूर्णता वैधानिक । संसद पुनर्स्थापना गुगुं हालतं जुइ मखु। निर्वाचनय् ब्वति कयाः जनताया न्हूगु जनमत कायेत प्रमजुं थः प्रतिद्वन्द्वीतय्त चुनौति बिउगु दु। नेकपा दुनेया कथित एकतां देय्या राजनीतियात सहज रुपय् न्ह्याकेगु सम्भव मजूगुलिं संसद भंग यानाः न्हूगु जनमतया लागि राजनीतिक पलाः छिनागु खँ प्रष्ट याइ । थम्हं छिनागु पलाखय् संविधान पङ्ग मजूगु खँ नं प्रधानमन्त्रीं स्पष्ट याइ । आः संसद पुनर्स्थापनाया लागि सर्वोच्च अदालतय् मुद्दा लाःगुलिं गुगु तर्क पाय्छि सी मदुनि । अदालतया अन्तिम फैसलां जक प्रधानमन्त्रीया पलाः संवैधानिक जू/मजू क्वःछी । अदालतं निर्णय मबिउतले प्रमं संसद भङ्ग याःगु व संसद पुनर्स्थापना बारे छिनफान जुइ मखुनि ।

छथ्वः पुलांपिं प्रधानन्यायाधिशपिंसं छगू हे सलं प्रम ओलीया संसद भङ्ग यानाः चुनावय् वनेगु निर्णय असंवैधानिक धकाःवक्तव्य जारी याःगु दु। उखे ओली पक्षं थ्व पूर्व प्रधानन्यायाधिशपिनि वक्तव्ययात अदालतया निर्णययात पिनें प्रभाव यायेगु गैर जिम्मेवारी, अनैतिक वक्तव्य धकाः कुंखिउँगु दु। प्रम ओलीजुं नं चुनावी अभियान शुरु यासे संसद पुनस्र्थापना गुगुं हालतं जुइमखु, चुनाव जुइ, जुइ, ल्वायेत तयार जू । थःगु भाषणय् जोड बियाः धया जुइ । ओलीया थज्याःगु ‘चुनाव जुइ, जुइ’ या घोषणां ओलीं अदालतयात प्रभावित याइ धइगु शंका नं विरोध पक्षं प्वंका हयाच्वंगु दु। देय्या न्यायालय नं राजनीतिकरण जुइधुंकल धइगु विश्वास थौं जनमानसय् न्यनाच्वंगुलिं न्यायालयया निर्णयप्रति जनता थथे हे धाये फुगु स्थिति मदु ।

स्वार्थं सत्तासिन पार्टी थौं निकू कुचा दले धुंकल । व्यावहारिक रुपं । गुगु आधिकारिक नेकपा खः । बेठेगान । औपचारिक रुपं नेकपा कुचा दःगु घोषणा मजूनि । नेकपा छगू हे तिनि ।

तर स्वतन्त्र व देय्या विकृत राजनीतिपाखे चिन्तित मनूतय्सें धाइ । न्यायालयं न्ह्यागु हे निर्णय बिउसां देय् या राजनीति थथें तप्यनी मखुनि । संसद पुनर्स्थापना जुयाः मेगु सरकार वःसां देशय् चमत्कारी रुपान्तरण जुइगु भ्याःमचा नं सम्भावना मदु। न्हूगु सरकार वइ । मनू पाइ । तर राजनीतिक घोचपेच, खिचिखिचि यथावत जुइ । सन्तोषया सासः ल्हाये थाय् दइमखु। अथे हे संसद विघटनयात अदालतं समर्थन याःसा देय् चुनावय् वनी । तर न्हूगु चुनावं नं देय्या राजनीतिइ हिउपाः हइ, आशा यायेथाय् मदु। थौंया व हे कथित नेतात चुनाव त्याका वइ । इमिसं हे शासन संचालन याइ । शक्तिया निंतिं हाकनं खेलत जुइ । चलखेलया पुनरावृत्ति जुइ । जनताया स्वार्थ गन लाइ, गन लाइ ।

थौं नेकपा पार्टीया ल्वापुं देय्यात तःधंगु हे धोका जूवंगु दु। खतुं शक्तिइ च्वना च्वंगुलिं प्रम ओली अप्वः दोषी खनेदत । तर ल्वापुइ ओली व प्रचण्ड पक्ष निखलकं उतिकं दोषी । निम्हेसिया शक्तिया ल्वापुया कारणं देय् थौ रसातलय् लाः वन । थुपिं दथुइ सम्भव हे मदुगु मेलया परिकल्पना यानाः नेकपाया एकता यात । देसं दुःख सिल । सैद्धान्तिक आधार मदयेक खालि शक्तिया प्रलोभनं नेकपाया नेतात एक जुल । फल स्वरुप शक्तिया छिनाझपतिं नेकपा क्वःदल ।

नेकपा सरकारया संकटपाखें छता खँ सीकेमाः । देशय् राजनीति व संविधान दथुइ द्वन्द्व वल कि समस्या जटिल जुइ । संविधानं यानाः नं देशय् अस्थिर राजनीतियात प्रोत्साहित याये मजिउ । राजनीतिक स्थिरताया नामय् संविधानयात नं खेलाचि याये मजिउ । राजनीति व संविधान दथुइ सन्तुलन दयेमाः । थौं देशय् वःगु संवैधानिक प्रश्न नेकपा दुनेया राजनीतिक तिकडमया लिच्वः खः ।