नेपाःया निंतिं चिनियाँ व्यापारिक नाका मचाल

येँ (नेपालभाषा टाइम्स)- चीनं कोभिड महामारी सुरु जूगु स्वदँ लिपा फुक्कं अन्तर्राष्ट्रिय नाका चायेकेगु धाःसां थ्व निर्णय नेपाःपाखेया व्यापारिक नाकाय् धाःसा कार्यान्वयन मजूगु खँ धाःगु दु । नेपाः व चीन दथुया थीथी सीमाय् च्वनाच्वंपिं नेपाली अधिकारीतय्सं चीनं अझ नं नेपाःपाखें वनीपिंत प्रवेश अनुमति मबिउनिगु खँ धाःगु दु ।

चीन व नेपाः दथुइ थौंकन्हय् दकलय् चले जूगु व्यापारिक नाका रसुवाया केरुङ व सिन्धुपाल्चोकया तातोपानी नाका खः । तर चीनं आःतकं थ्व निगुलिं नाकां प्रवेश मबिउनि । अथेहे मुस्ता«या कोरला, संखुवासभाया किमाथाङ्काया नाकां नं अझं दुहां वयेके मबिउनिग् खँ धाःगु दु । रसुवाया सिडिओ प्रकाशचन्द्र अधिकारीं बिबिसी नेपाली सेवालिसे खँ ल्हासें रसुवागढी नाकां अझं मचाःनिगु व थुकियात चायेकेगु निंतिं पहल जुयाच्वंगु खँ धाःगु दु ।

रसुवाया टिमुरे भन्सार कार्यालयया कथं नेपाली गाडीयात अझ नं केरुङया नाकां दुकाःगु मदुनि । अथे जूबलय् चीनं वइगु सामान चिनिया गाडीइ हे तयाः नाकाय् तक हयेगु व अनं जक नेपाली गाडीइ तया हयेमालाच्वंगु दु । गुकिं यानाः लोड, अनलोड लिसें ढुवानी खर्च अप्वया सामानया भाः थहां वनाच्वंगु दु ।

चीनं नाका चायेकेगु घोषणा यायेधुंकाः नेपाःपाखें छुं सामान उखे निर्यात धाःसा जूगु दु । चीनं झिंन्यान्हुइ छक्वः नीगः गाडी चीनपाखे सामान ज्वनाः वयेके बीगु धकाः अनुमति बिउगु खँ टिमुरे भन्सार प्रमुख नारायणप्रसाद भण्डारीं कंगु दु ।

कोभिड न्ह्यः केरुङं जक न्हि सछिगलं मल्याक कन्टेनर सामान नेपाःपाखे वयेगु यानाच्वंगु खःसा थौंकन्हय् न्हि झिंप्यंगः कन्टेनर जक वयाच्वंगु दु । अथेहे तातोपानी भन्सारं नं न्हि न्यागः कन्टेनर जक वयाच्वंगु दु ।

तःभुखाय् लिपा बन्द जूगु तातोपानी नाका थ्वयां प्यदँ लिपा चाःगु खः । उबलय् न्हिं नीगः तक कन्टेनर सामान आयात जुइगु सुरु जुइधुंकूगु खःसा कोभिड लिपा आः न्हिं न्यागः गाडी जक वयाच्वंगु खँ अनया भन्सार अधिकृत दयानन्द केसीं धाःगु दु ।

थ्वहे दथुइ परराष्ट्र मन्त्रालयं चिनियाँ नाका चायेकेगु निंतिं मन्त्रालयं पाखें पहल जुयाच्वंगु खँ धाःगु दु । परराष्ट्र मन्त्रालयया प्रवक्ता सेवा लम्सालं नाका पूवंक संचालन यायेगु निंतिं नेपाली पक्षं कुतः यानाच्वंगु जानकारी बिउगु दु । वय्कलं न्हू वःम्ह चिनिया राजदूत चेन स«ं नाका चायेकेत सहजीकरण याइगु विश्वास प्वंकादीगु दु ।