कन्हय् महाकविया किपा बग्गीइ तयाः चाःहीकीगु

येँ (नेपालभाषा टाइम्स)- महाकवि सिद्धिदास महाजुया १५७ दँ बुन्हि कन्हय् थीथी ज्याझ्वः यासें हनीगु जूगु दु । महाकवि सिद्धिदास बुन्हिया लसताय् दँय्दसं थें कन्हय् सुथय् ६ः३० बजे थनया जनबहालं नसंचा उलेगु ज्याझ्वः जुइ । नेपालभाषा मंकाः खलः, सिद्धिदास स्मृति समाज व मच्छेन्द्र क्लबया मंकाः ग्वसालय् जुइगु थ्व ज्याझ्वलय् महाकविया किपायात बग्गीइ तयाः चाःहीकीगु ग्वसाः दु । सदां थें नसंचा म्ये हालाः येँया थःने व क्वःने लागा चाःहिलाः जनबहाः दबुलिइ थ्यंकाः क्वचायेकी ।

अथे हे कन्हय् हे सनिलय् भोताहिति दुवातय् च्वंगु सिद्धिदास महाजुया झ्वाताय् मत च्याकाः बुन्हि हनीगु नं ग्वसाः दु । थ्व लसताय् ख्वपय् नं कन्हय् थीथी ज्याझ्वः यासें बुन्हि हनीगु ग्वसाः दु ।