दशअवतार देगः निर्माण कम्पनीयात कालोसूचीइ तयेगु ख्याच्वः
येँ (नेपालभाषा टाइम्स) – पुरातत्व विभागं येँया बसन्तपू लागाय् च्वंगु दश अवतार देगः वइगु चैततकया दुने नं निर्माण सम्पन्न मयात धाःसा निर्माण कम्पनीयात कालोसूचीइ तयेगु ख्याच्वः बिउगु दु ।
२०७२ बैशाखया भुखाचं क्षति जूगु बसन्तपू लाय्कू लागाया देगः पुनःनिर्माणया निंतिं सम्झौतम जूगु प्यदँ दयेधुंकाः नं निर्माण सम्पन्न जूगु मदुनि । उगु देगः पुनःनिर्माणया निंतिं २०७३ चैत ३० गते प्राकृतिक÷सानुबाबु÷एसटी जेभीलिसे निर्माण सम्झौता जूगु खः । विभागं देगः निर्माणया जिम्मा काःगु कम्पनीं प्यदँतक नं निर्माण सम्पन्न मयायेवं वइगु चैततकया दुने निर्माण सम्पन्न मयात धाःसा कालोसूचीइ तयेगु ख्याच्वः बिउगु खः ।
सम्ताझौता कथं २०७५ साउन १५ गते हे निर्माण सम्पन यायेमाःगु खः । तर शुरुइ स्थानीयवासीं देगः पुनः निर्माण व्यवसायीपाखें मखसे समुदाययात हे जिम्मा बीमाः धायेवं छुं ई निर्माणया ज्या रोके जूगु खः । निर्माणया ज्या दीवं विभागं वंगु २०७६ असोज १५ गते न्हापांखुसी म्याद थप याःगु खः ।
न्हापाखुसी म्याद थप यायेधुंकाः नं देगः निर्माण यायेगु ज्या सिमधयेवं विभागं निक्वःखुसी २०७६ चैत मसान्ततकया निंतिं म्याद थप याःगु खः । वयां लिपा कोरोना महामारीया कारणं ज्या याये मफुगु धासें निर्माण कम्पनीं वंगु बैशाखय् निवेदन बियाः हाकनं म्याद थप याःगु खः । व्यवसायीतय् मागकथं हे लिपांखुसी थप जूगु म्यादकथं वइगु चैत मसान्ततकया दुने देगः पुनःनिर्माण सम्पन्न यायेमाःगु खः ।
विभागया महानिर्देशक दामोदर गौतमं लिपांखुसी म्याद थप जूकथं चैत दुने नं देगः पुनःनिर्माण सम्पन्न मजुल धाःसा निर्माण कम्पनीयात कालोसूचीइ तयाः कारवाहीया निंतिं सिफारिस यायेगु जुइ धयादिल ।
LEAVE YOUR COMMENTS