नियम संशोधनं ओली तंचाल

निर्वाचन आयोगं दलया विवाद ज्यंकेगु नियम संशोधन यात

येँ (नेपालभाषा टाइम्स) – निर्वाचन आयोगं राजनीतिक दल सम्बन्धी नियमावली संशोधन यानाः निर्वाचनया इलय् तक नं राजनीतिक दलया विवाद ज्यंके फइ कथंया नियम दयेकूगुलिं नेकपाया ओली पक्षं असन्तुष्टी प्वंकूगु खँ सीदुगु दु ।

आइतवाः च्वंगु आयोगया बैठकं नियमावली संशोधन यानाः गुगुं नं अवस्थाय् आयोगं राजनीतिक दलया विवाद ज्यंके फइ कथं संशोधन याःगु खः । आयोगया उगु निर्णय गलत जूगु ओली पक्षया दावी दुगु खँ सीदुगु दु । निर्वाचन आचार संहिता कथं गुकुन्हु सरकारं निर्वाचनया मिति घोषणा यात उकुन्हुंनिसें निर्वाचनया ई शुरु जुइ । अज्याःगु इलय् दलया विवाद निर्वाचन आयोगं स्वये मजिउ धइगु प्रावधान दुगु खः । तर निर्वाचन आयोगं थीथी राजनीतिक दलया विवाद ज्यंकेमाःगुलिं ऐन संशोधन यायेमाःगु खँ धाःगु दु ।

राजनीतिक विवाद मज्यंकेगु खःसा छुं छुं राजनीतिक दलतय्सं आः सरकारं घोषणा याःगु निर्वाचनय् ब्वति काये तकं मफइगु जुयाः निर्वाचन आयोगं ऐन संशोधन यायेमाःगु खः । निर्वाचन आयोगया कथं राजनीतिक दलसम्बन्धी थीथी विवाद आयोगय् दर्ता जुयाच्वंगु दु । माओवादी केन्द्रया गोपाल किराँती लिसे नेपाल कम्युनिष्ट पार्टीया न्हूगु विवाद नं वयाच्वंगु दु । अज्याःगु विवाद ज्यंकेगु ज्या मजुल धाःसा उमिसं निर्वाचनय् ब्वति कायेफइ मखु । अथेजुयाः ऐन संशोधन यायेमाःगु खः ।

निर्वाचन आयोगया कथं राजनीतिक दल सम्बन्धी ऐनया दफा ४४ स गुगुं पार्टीया निगू पुचः दथुइ आधिकारिकताया विवाद वल धाःसा सुया केन्द्रीय कमिटीइ बहुमत दु उगु पार्टीयात पुलांगु पार्टीया आधिकारिकता बीगु व मेगु पुचःयात न्हूगु दलया रुपय् दर्ता यायेमाःगु नियम दु । आयोगया कथं विवाद वयेधुंकाः सुनुवाइ यायेमाःगु व पीन्यान्हुया दुने समाधान यायेमाःगु व्यवस्था ऐनय् दु । उकथं हे ऐनं गुगुं नं इलय् दलया उजुरी कायेमखु धकाः नियम दयेकेगु छुट मबिउगुलिं न्हापा दुगु ऐन खारेज यानाः आः न्हूगु नियम दयेकूगु खः ।

राजनीतिक दलसम्बन्धी नियमावली २०७४ या नियम २३ या उपनियम ६ स च्वयातःगु दु, ‘थुगु नियमय् मेथाय् न्ह्याग्गु खँ च्वयातःगु खःसां नं निर्वाचन ई दुने विवाद निरुपण सम्बन्धय् गुगुं नं कारवाही यायेगु जुइमखु ।’ तर आः जूगु संशोधनं उगु व्यवस्थायात चीका बिउगु
खः ।

संविधान व कानुनलिसे ल्वाःगुलिं उगु नियम संशोधन यायेमाःगु खँ निर्वाचन आयोगं धाःगु दु । तर ओली पुचलं धाःसा थुगु संशोधनया विरोध याःगु खँ सीदुगु दु । नियम संशोधन मजूगु खःसा नेकपाया विवाद आयोगं स्वये मदइगु व उकिया लबः थःपिंत दइगु अनुमान ओली पुचलं याना वयाच्वंगु खः ।

सम्बन्धित बुखँ

LEAVE YOUR COMMENTS