लुम्बिनीइ विशेष सुचुकुचु अभियान

येँ(नेपालभाषा टाइम्स)- लुम्बिनी विकास कोषं बुद्ध जन्मस्थल लुम्बिनीइ विशेष सुचुकुचु अभियान न्ह्याकूगु दु । भगवान बुद्धया जन्म, संबोधि लाभ व महापरिनिर्वाण प्राप्त यानाबिज्याःगु २५६८ क्वःगु स्वांयाःपुन्हियात ध्यानय् तयाः लुम्बिनीलिसें कपिलवस्तुइ विशेष सुचुकुचु अभियान न्ह्याकूगु खः ।

कोषया कर्मचारीलसें नेपाली सेनां लुम्बिनी परिसरय् विशेष सुचुकुचु यायेगु ज्या याना वयाच्वंगु दु । कोषं लुम्बिनी क्षेत्र जःखः नापं शान्तिदीप, मायादेवी देगःया पिनेया लागा, मुख्य नहर क्षेत्रलिसें लुम्बिनी दुहां वनेगु ४ व ५ नं गेट जःखःया लागाय् विशेष सुचुकुचु अभियान न्ह्याकूगु खः ।

‘ग्रीन लुम्बिनी, क्लिन लुम्बिनी’ नारा बियाः बुद्ध जन्मस्थल व उकिया जःखःया लागायात स्वच्छ, सफा यायेगु उद्देश्यं उगु अभियान न्ह्याकागु कोषं न्ह्यथंगु दु ।
थ्व स्वयां न्ह्यः नं कोषं नियमित रुपं सुचुकुचु यायेगु याना वयाच्वंसां गेट नं. ४ व ५ य् जनचेतना व सचेतनाया निंतिं अभियान न्ह्याकागु कोषं न्ह्यथंगु दु ।

थुपिं निगू गेटलिक्कं स्थानीयतय्सं फोहर वांछ्वयेगु याना वयाच्वंगुलिं सचेतनाया निंतिं सुचुकुचु अभियान न्ह्याकागु कोषया सरसफाइ चता वृक्षारोपण उपसमितिया संयोजक सरोज भट्टराईं जानकारी बियादीगु दु ।

लुम्बिनी क्षेत्रय् फोहर व्यवस्थापनया समस्या समाधान मजूगुलिं स्थानीय होटल व मेमेगु व्यवसाय यानाच्वंपिं व्यवसायीतय्सं कोष परिसरयात हे डम्पिङ साइट दयेकाः फोहर व्यवस्थापन याना वयाच्वंगु दु । गुकिं यानाः कोष परिसरलिसें महिलबार लागाय् प्रदूषण अप्वया वनाच्वंगु दु ।