सुयातं कासापाखा यायेमखु ः महर्जन

यल(नेपालभाषा टाइम्स)- यल महानगरपालिकाया प्रमुख चिरिबाबु महर्जनं सेवा प्रवाह यायेगु खँय् थम्हं सुयातं काखापाखा यानागु मदु धयादीगु द । प्रमुख महर्जनं यल महानगरपाखें बीगु सेवा प्रवाहय् थम्हं न्हापा नं सुयातं काखापाखा मयानागु व आः नं अज्याःगु याये मखु धयादीगु दु ।

प्रमुख महर्जनं उगु खँ ‘सुशासन व सेवा प्रवाहय् स्थानीय तहया भूमिका’ विषयय् जूगु अन्तक्र्रियाय् नवासें धयादीगु खः । ज्याझ्वलय् नवासें वय्कलं सुशासन व सेवा प्रवाहय् आपालं न्हूगु ज्या याना वयाच्वनागु दावी यासें नियम, कानून, प्रक्रियां पिहां वनाः थम्हं न्हापाया कार्याकालय् नं ज्या मयानागु व आः नं यायेगु जुइमखु धयादीगु खः ।

सार्वजनिक निर्माणय् सुरक्षायात न्हापांगु प्राथमिकता मबिउतले सम्झौता हे जुइ मफइगु अवस्था सिर्जना यायेमाःगु खँय् नं बः बियादिल ।

ज्याझ्वलय् कार्यवाहक महालेखा परीक्षक राममाया कुँवर, राष्ट्रिय सतर्कता केन्द्रया निमित्त सचिव विनु वज्राचार्य कुँवर, येँ जिल्लाया प्रमुख जिल्ला अधिकारी घनश्याम उपाध्याय, यल जिल्लाया प्रमुख जिल्ला अधिकारी रुद्रप्रसाद पण्डित, अख्तियार दुरुपयोग अनुसन्धान आयोगया सहसचिवलिसें प्रवक्ता भोला दाहाल, यल महानगरया प्रमुख प्रशासकीय अधिकृत गणेश अर्याल लगायतं नं नुगःखँ तयादीगु खः ।