नेपालय् ४० प्रतिशतयात ओमिक्रोन जुइफु

येँ – सरकारं ओमिक्रोन भेरियन्टं ४० प्रतिशत नागरिक संक्रमण जुइफइगु अनुमान याःगु दु । नेपालय् आः तक ओमिक्रोन पुष्टि जूपिं २७ म्ह जक दुसां नं भारतय् ओमिक्रोनं प्रभावित जूपिं अप्वःगुलिं उकिया लिच्वः नेपालय् लाये फइगु अनुमान स्वास्थ्य मन्त्रालयं याःगु दु ।

लिपांगु इलय् भारतं नेपाः लिहां वइपिं नेपाःमि अप्वया वनाच्वंगुलिं नं सरकारं उगु अनुमान याःगु खः । भारतय् न्हिं निगू लाख तक ओमिक्रोन संक्रमण जुइवं उकिया लिच्वः नेपालय् लायेफइगु अनुमान सरकारं याःगु खः । थ्वहे झ्वलय् स्वास्थ्य मन्त्रालयया सहप्रवक्ता डा. समिरकुमार अधिकारीया कथं नेपालय् संक्रमितया ल्याः तीव्र रुपं अप्वया वनाच्वंगु दु । तर संक्रमित जूपिं मध्ये अप्वःसित डेल्टा भेरियन्ट

पुष्टि जूगु खँ नं वय्कलं कनादिल ।
सरकारया तथ्यांक कथं आः तक खोप काःपि ७६.५ प्रतिशतं न्हापांगु मात्रा खोप कायेधुंकूगु दुसा पूर्ण मात्रा ५६.९ प्रतिशतं कायेधुंकूगु दु । थ्व आधारय् स्वास्थ्य मन्त्रालयया कथं संक्रमितया ल्याः अप्वःसां जटिल अवस्था विरामी धाःसा म्हो जुइगु आंकलन याःगु दु । संक्रमित मध्ये ५ प्रतिशतयात जक स्वास्थ्यय् जटिल अवस्था ब्वलने फइगु अनुमान मन्त्रालयं याःगु दु । सरकारं १८ दँ स्वयां च्वय्यापिं १ करोड ९९ लाख २२ हजार १६४ नेपाःमियात पुस मसान्त तक कोरोना विरुद्धया खोप बीगु आज्जु तयातःगु दु ।

थ्वहे झ्वलय् प्रधानमन्त्रीया सरकारी निवास बालुवाटारय् नं कोरोना संक्रमण जूगु दु । सोमवाः प्रधानमन्त्री शेरबहादुर देउवा लिसें बालुवाटारय् ज्या यानाच्वंपिं कर्मचारीया पीसीआर परीक्षण याकूगु खः । उकी देउवाया रिपोर्ट नेगेटिभ वःसां भान्से व छुं सुरक्षाकर्मीयात रिपोर्ट पोजिटिभ वःगु खँ धाःगु दु ।