प्रधानमन्त्री मोदीं देशद्रोह याःगु खः– राहुल गान्धी

एजेन्सी( कांग्रेसया नेता राहुल गान्धीं शुक्रवाः भारतया प्रधानमन्त्री नरेन्द्र मोदी व गृहमन्त्री अमित शाहं देशद्रोह याःगु द्वपं बिउगु दु । नेता गान्धीं भारतय् पेगासस सफ्टवयेर छ्यलाः प्रधानमन्त्री मोदी व गृहमन्त्री शाहं भारतया संवैधानिक संस्था विरुद्ध ज्या याःगु व उकीयात देशद्रोह जक धायेफइ धाःगु दु ।

नेता गन्धीं उच्च अदालतया निगरानी न्यायिक जाँचया नं माग याःगु दुसा गृहमन्त्री अमित शाहया राजीनामाया माग नं याःगु दु । पत्रकारतलिसे खँल्हाबल्हा यासें गान्धीं पेगासस इजरायल आतंकवादी विरुद्ध दयेकूगु हतियार जूगु, तर प्रधानमन्त्री व गृहमन्त्रीं थीथी संस्था विरुद्ध छ्यगु द्वपं बिउगु खः । गान्धी थःगु सः जनतायागु सः खः धाःगु दु ।

इजरायलय् च्वंगु एनएसओ कम्पनी दयेकूगु जासुसी सफ्टवयेर पेगाससया ग्वाहालिं थीथी देसं अधिकारकर्मी, पत्रकार, कुटनीतिज्ञ व नेतातय्गु फोन ह्याक यानाः जानकारी कयावयाच्वंगु खँ सार्वजनिक जूगु खः । विश्वय् नांजाःगु अन्तर्राष्ट्रिय समाचार संस्थातय्सं थुकिया बारे समाचार पिकाःगु खः । पेगाससया निर्मातातय्सं धाःसा थुकी थःपिनिगु दोष मदुु धायेधुंकूगु दु । पेगासस दयेकूगु कम्पनीं थ्व सफ्टवेयर आतंकवादविरुद्ध छ्यलेत दयेकाःगु धाःगु खः ।