नुवाकोटय् भाषा विधेयकयात लसकुस

नुवाकोट (नेपालभाषा टाइम्स)- बाग्मती प्रदेसया संसदं नेपालभाषा व तामाङ भाषायात सरकारी कामकाजी भाषा यायेगु विधेयक सर्वसम्मतं पारित याःगुयात कयाः नुवाकोट जिल्लाया विदुर नगरय् लसकुस यासें सांसदपिंत सुभाय् देछाःगु दु । नेवाः देय् दबू नुवाकोट जिल्ला समिति व नेवाः देय् दबू विदुर नगर समितिया मंकाः ग्वसालय् शनिवाः बटारया पुलांगु बजाय् च्वंगु फल्चाय् थुगु ज्याझ्वः जूगु खः ।

नेवाः देय् दबू नुवाकोट जिल्ला समितिया नायः रामप्रसाद जोशीया सभापतित्वय् जूगु ज्याझ्वः देय् दबू बागमती प्रदेश समितिया दुजः नरेन्द्र प्रधानं न्ह्याकादीगु खः । ज्याझ्वलय् न्ववानादिसें मूपाहां नेवाः देय् दबू स्वनिगः विशेष प्रदेशया नायः श्रीकृष्ण महर्जनं आः स्थानीय सरकारयात नं स्थानीय भाषाया ऐन दयेके बीगु निंतिं भूमिका म्हितेमाःगु खँ कनादिल । अथेहे भाषा विधेयक पारित याःगु दिं असोज २२ गतेयात आः नेपालभाषा ख्यलं लसताया दिं कथं हनेमाःगु बिचाः नं वय्कलं तयादीगु खः ।

ज्याझ्वलय् स्थानीय खलः पुचःया प्रतिनिधिपिंसं नं भिंतुना देछाःगु खः । उकुन्हु हे बहनी बटारया फल्चाय् मैन मत च्याकाः धिमे बाजं थानाः उत्सव नं न्यायेकूगु खः ।