चीनं २०२८ य् अमेरिकायात लिफ्याइगु

एजेन्सी – चीनं सन् २०२८ य् विश्वया दकलय् तःधंगु अर्थतन्त्रया रुपय् अमेरिकायात लिछ्याइगु छगू प्रतिवेदनं धाःगु दु । बेलायतया सेन्टर फर इकोनामि एन्ड बिजेनस रिसर्चया प्रतिवेदनय् क्यनातःगु ई न्हापा अनुमान यानातःगु स्वयां न्यादँ न्ह्यः जूवःगु खँ धाःगु दु । सेन्टरया कथं कोभिड १९या इलय् शीपं जाःगु व्यवस्थापनया कारणं चीनया उन्नति अमेरिका व युरोप स्वयां याकनं जुइगु खनेदुगु खः ।

अथेहे भारतया अर्थतन्त्र धाःसा सन् २०३० य् विश्वया हे स्वंगूगु दकलय् तःधंगु अर्थतन्त्र जुइगु अनुमान यानातःगु दु । भारतं सन् २०१९ य् बेलायतया अर्थतन्त्रयायात विश्वया न्यागूगु थासय्ं विस्थापित याःगु खःसां कोभिड १९ लिपा हाकनं लिउने लाःवंगु दु । प्रतिवेदनय् भारतं सन् २०२४ य् बेलायतयात, सन् २०२७ य् जर्मनीयात व सन् २०३० य् जापानयात लिउने लाकीगु अनुमान यानातःगु दु। सेन्टरं दँय्दसं डिसेम्बर २६ य् थःपिनि प्रतिवेदन सार्वजनिक यायेगु याइ । चीनय् दकलय् न्हापां कोरोना भाइरसया संक्रमण खनेदुगु खःसां तुरुन्त हे कडा प्रावधान लागू यानाः थुकियात नियन्त्रण याःगु खः, गुकिं यानाः मेमेगु देशं थनं छक्वःपतिकं लकडाउन यानाः अर्थतन्त्र ठप्प यायेमाःगु अवस्था मवल । थुकिया हे लिच्वः कथं सन् २०२० य् मेमेगु तःधंगु अर्थतन्त्रय् मन्दी खनेदुगु खःसां चीनया अर्थतन्त्र धाःसा निगू प्रतिशतं थहां वनीगु खनेदुगु दु ।

कोभिडया कारणं अमेरिकाया अर्थतन्त्र धाःसा दकलय् बांमलाक स्यंगु दु । प्रतिवेदनया कथं सन् २०२१ य् कोभिड १९ पाखें अर्थतन्त्रय् सुधार वयेधुंकाः अमेरिकाय् सन् २०२२ निसें २०२४ तक १.९ प्रतिशतं जक अर्थतन्त्रय् वृद्धि जुइसा थ्व धुंकाः १.६ प्रतिशतं जक वृद्धि जुइगु खनेदु। चीनया अर्थतन्त्र धाःसा सन् २०२५ तक ५.७ प्रतिशतं थहां वनीगु व सन् २०२६ निसें २०३० तक ४.७ प्रतिशतं थहां वनीगु अनुमान दु ।