संविधानय् संसद विघटन प्रावधान : तयेके मबिउपिं हे ओली, भण्डारी व नेम्वाङ
येँ (नेपालभाषा टाइम्स) – प्रधानमन्त्री केपी ओलीं याःगु संसद विघटनया सिफारिस कथं राष्ट्रपति विद्यादेवी भण्डारीं उकियात अनुमोदन यायेवं आः संसद् दनि कि विघटन जुल धयागु विवाद तच्वयाच्वंगु दु । ओली पक्षयापिंसं राष्ट्रपतिं हे संसद् विघटनया घोषणा यायेधुंकाः संसद मदयेधुंकूगु दावी यानाच्वंगु दुसा छथ्वः संविधानविद्तय्सं धाःसा संविधानय् संसद विघटनबारे छुं उल्लेख जुयाच्वंगु मदुलिं राष्ट्रपतिं संसद विघटन धायेवं तुं विघटन जुइ मखु धयाच्वंगु दु ।
न्हापा गिरिजाप्रसाद कोइराला, मनमोहन अधिकारीपिंसं थःथःपिनि पार्टी दुनेया विवादया कारणं संसदयात हे विघटन यायेगु थेंज्याःगु निकृष्ट ज्या याःगुलिं २०७२ सालय् संघीय गणतन्त्र नेपालया संविधान दयेकूबलय् प्रधानमन्त्रीपाखें संसद विघटन याये मदइगु कथं हे संविधान च्वःगु संविधानविद्तय्सं धया वयाच्वंगु दु । उबलय् संविधान दयेकूबलय् प्रधानमन्त्रीं संसद् विघटन याये मदइगु कथंया बुँदा तयेगु निंतिं दकलय्त च्वयेक सः तःपिं हे आः संसद विघटनय् भूमिका म्हितूपिं प्रधानमन्त्री ओली, राष्ट्रपति विद्यादेवी भण्डारी व तत्कालीन संविधानसभाया अध्यक्ष सुवास नेम्वाङ जूगु खँ धाःगु दु ।
संविधानविद् टिकाराम भट्टराईं छगू टेलिभिजन अन्तर्वार्ताय् उबलय् संविधान दयेकूबलय् प्रधानमन्त्रीं थःगु सत्ता वनीगु जुलकि संसद् विघटन यायेगु थेंज्याःगु निकृष्ट ज्या यायेफुगुलिं थज्याःगु प्रावधान हे तयेमजिउ धकाः दकलय् तच्वयेक सः तःपिं हे ओली, भण्डारी व नेम्वाब जूगु खँ धयादीगु दु ।
उबलय् संविधानसभाया तत्कालीन अध्यक्ष नेम्वाङ संविधान दयेकेधुंकाः प्रतिक्रिया बीगु झ्वलय् धयादीगु खः, ‘संसद भंग यायेगु अधिकारयात प्रधानमन्त्रीं संसद् विरुद्ध दायेगु कथि थें छ्यलेगु यानाच्वंगु दु । नेपाःया प्रजातान्त्रिक अभ्यासय् थज्याःगु प्रावधानया दुरुपयोग जूगुलिं थुकियात न्हूगु संविधानं चीकाछ्वयागु दु ।’
नेकपा संसदीय दलया उपनेता जुयाच्वंम्ह नेम्वाब थौंकन्हय् प्रधानमन्त्री ओलीयात संसद् विघटनया पक्षय् च्वनाच्वंगु दु । आःया संविधानय् संसद्वि घटनया प्रावधान हे मदुगुलिं प्रधानमन्त्री ओलीं संसद विघटनया सिफारिस याःबलय् तकं संविधानया छुं हे बुँदा उल्लेख याःगु मदु ।
LEAVE YOUR COMMENTS