‘राहत तकं वांछ्वइपिं’

नेपालभाषा टाइम्स
११४० चौलागा पारू
- बुखँ
- स्वनिगः
किपा-छुं न्हि न्ह्यव येँया न्हूसतकय् राहत इनाच्वंगु । किपा - रासस

दिलिप शाही

येँ -कोरोना भाइरसया प्रकोपया कारणं नेपाःयात पूर्ण रुपं सरकारं ‘लकडाउन’ यायेधुंकाः न्हिथं ज्या यानाः नयेमाःपिनि समस्यायात थुइकाः छुं छुं नुगः दुपिंसं नयेगु जोरे यानाः थीथी थासय् वनाः नकेगु यानाच्वंगु दु । तर थथे दया तयाः नकूगु नसाज्वलं नं नयेमखंपिं धाःपिंसं का जक कयाः वांछवेगु नं यानाच्वंगु दु ।

थज्याःगु हे दृश्य थौं सुथय् खनेदत । सुथंनिसें अय्लाः त्वना जुइपिं मनूत लँय् वयाच्वंगु इलय् छगः गाडीं कुहां वयाः छम्ह मनुखं उपिं प्यम्ह न्याम्हेसित प्याक यानातःगु नसा ज्वलं बिल । उकी जा, केँ व तरकारी तयातःगु दु । उमिसं उगु प्याकेट ला काल तर छुं भचा तापाक वनाः प्याकेट फुक्कं खिचा दुथाय् प्वंकाबिल, अले थःथवय् खँल्हात ‘नयेगु बीगु स्वयां ध्यबा बिउसा जिउगु खः नि ।’

थ्व दृष्य स्वया च्वनाबलय् उमिगु मनस्थिति छु खः धकाः न्यनाः लिसः वल, ‘ध्यबा बिउगु खःसा अय्ला त्वःने दइगु, जिमित नयेगु छु यायेत, बरु जिमित जाकी हे बिउसां जिउ, मियाः अय्लाः ला त्वने दइ ।’

अथे हे विष्णुमति खुसी सिथय् छम्ह मनूखं गाडीइ नसा ज्वलं तयाः ज्वना वल । छम्ह तराई मूलयाम्ह मिसां न्हापा पर्सी व ब्लाउज जक फिनाः छगू प्याकेट राहत काल, अनं लिपा हाकनं थः च्वना च्वनागु क्वथाय् वनाः राहत तयाः सुइटर छपाः फिनाः हाकनं राहत काल, हाकनं क्वथाय् तुं लिहां वयाः सुइटरया द्यःने हाकनं गा छपू न्ययाः राहत कायेत वन, थ्व दृष्य स्वयाच्वंम्ह छम्ह स्थानीय मनूखं सह याये मफुत, कथि ज्वना उम्ह मिसायात लिना यंकल ।

राहतया नामय् थुकथं मनकारीं बिउगु राहत गुकथं दुरुपयोगु जुयाच्वन थ्व निगू प्रतिनिधि घटना जक खः । थज्याःगु घटना आपालं थासय् जुयाच्वंगु दयेमाः । थुखेपाखे नं सम्बन्धित निकायं ध्यान बीमाःगु आवश्यकता दु । गुलिसिया ज्या मदयाः, नये मखनाः नं राहत कायेफयाच्वंगु मदुसा गुलिस्यां धाःसा वःगु राहत नं वांछ्वयेगु यानाच्वंगु दु । अले गुलिस्यां धाःसा छकः निकः जक मखु राहत बिउ वक्वपतिकं लाकालुक यानाः कायेगु यानाच्वंगु दु ।