संवैधानिक नियुक्ती मुद्दाय् तत्काल सुनुवाईया माग

येँ -संवैधानिक निकायया पदाधिकारी नियुक्ती विवादय् थम्हं बियागु रिटया तत्काल सुनुवाइया माग यासें अधिवक्ता ओमप्रकाश अर्यालं सर्वोच्च अदालतय् पूरक निवेदन दर्ता याःगु दु ।
न्यायाधीश हरि फुयालं एकल इजलासं संवैधानिक इजलासय् सुनुवाइ यायेगु सम्बन्धी आदेश बिइधुंकाः थ्व मुद्दाया प्रक्रिया दिनाच्वंगु खः । उगु इजलासं प्रधानन्यायाधीश मदयेकं संवैधानिक इजलास च्वनेमफइगु आदेश बीवं संवैधानिक नियुक्त रिटया सुनवाई दिउगु खः ।

केपी शर्मा ओली नेतृत्वया सरकारं हःगु अध्यादेश कथं च्वंगु संवैधानिक परिषदया बैठकं थीथी संवैधानिक निकायय् याःगु नियुक्ति बदर यायेमाःगु माग यासें अर्यालं सर्वोच्च रिट बिउगु खः । अध्यादेश कथं संवैधानिक नियुक्तिइ प्रधानन्यायाधी नं दुथ्याःगुलिं थुगु रिटया सुनवाई प्रधानन्यायाधीश मदइगु संवैधानिक इजलासय् सुनुवाइ यायेमाःगु माग जूगु खः । तर न्यायाधीश फुयालया एकल इजलासं प्रधानन्यायाधी मदयेकं संवैधानिक इजलास च्वने मफइगु आदेश बीवं सुनुवाई स्थगित जुयाच्वंगु दु ।

अधिवक्ता अर्यालं थम्हं बियागु रिटया सुनुवाइ तत्काल सुरु यानाः प्रारम्भिक सुनुवाइपाखें अन्तरिम आदेश जारी यानाः निरन्तरता बीत आदेश नं माग याःगु दु । वय्कलं संवैधानिक इजलासया सुनुवाइ पंगः जुइ कथं जुयाच्वंगु ज्या निष्क्रिय यायेत, पनेत, पुनरावृत्ति जुइके मबित व पंगः मदयेक सुनुवाइ न्ह्याकेमाःगु टिप्पणी सहित आदेश माग यानातःगु दु ।