बाहिरी चक्रपथय् नेतातय् जग्गा

येँ – विवादय् लानाच्वंगु बाहिरी चक्रपथया लँपाखें थिउगु फुक्क हे थासय् पिनें वयाच्वंपिं जग्गा दलाल जक मखु थन च्वनाः राजनीति यानाच्वंपिं थीथी राजनीतिक पार्टीया नेतातय्सं प्रशस्त मात्राय् जग्गा न्याना तःगु खँ सीदुगु दु ।

अनया जग्गाथुवाः नेवाःतय्सं मिया तयेधुंकूगुलिं आः अन लँ दयेकल धाःसा उकिया लबः नं मेपिंसं हे काइगु जुयाच्वंगु दु । सूत्रं बिउगु जानकारी कथं थीथी दलया नेतातय्सं बाहिरी चक्रपथ लागाय् म्हतिं हे सलंसः रोपनी जग्गा न्यानातःगु दु । थुकी फुक्क धइथें पार्टीया नेतात दुथ्याः ।

थुकी विशेष यानाः नेपाली कांग्रेसया नेता विजयकुमार गच्छेदार, नेकपाया हृदयश त्रिपाठी, ईश्वर पोखरेल आदिया नां न्ह्यःने वयाच्वंगु दु । उमिसं रोपनी का रोपनी हे जग्गा न्याना तःगु सूत्रया दावी दु ।

अथेहे गुलिखे च्वय्या पदय् च्वंपिं पुलांपिं सरकारी कर्मचारीतय्सं नं अन जग्गा न्यानातःगु दु । उपत्यका विकास प्राधिकरणया प्रमुख भाइकाजी तिवारी समेत दुथ्याःगु उच्चस्तरया कर्मचारीतय्गु छगू पुचलं नं अनया जग्गाय् लगानी यानातःगु दु ।

सरकारी कर्मचारी व नेतातय्सं प्रति आना १ लाखंनिसें १ लाख ५० हजार तकाः अन जग्गा न्यानातःगु खः । आः उकिया भाः थहां वनाः २० लाख स्वयां अप्वः थ्यनेधुंकूगु दु । चक्रपथ विस्तार यायेगु ज्या शुरु जुल धाःसा थुकिया भाः अझ थहां वनाः आनां ४० निसें ५० लाख तक थ्यने फइगु अनुमान जुयाच्वंगु दु ।

राजनीतिक नेता व सरकारी कर्मचारीतय्के चक्रपथ बारे न्हापा हे पूवंक सुचं दइगु जूगुलिं उमिसं अन चक्रपथ दयेकीन धइगु खँ पिहां वये न्ह्यः हे स्थानीय जनतायात थीथी त्रास व प्रलोभन क्यनाः दंक जग्गा न्याना तःगु खः । सूत्रं न्हापा ख्वनाय् नं थीथी योजना वइगु व उकिया लागिं सरकारं जग्गा अधिग्रहण यानाः काइ धकाः ख्यानाः प्रति आना १ लाखंनिसें ३ लाख तकां न्याःगु जग्गा आः प्रति आना १२ लाख स्वयां अप्वः ध्यबां कारोबार यानाच्वंगु खँ धाःगु दु ।

बाहिरी चक्रपथ दयेकेगु लागिं सरकारं जिरो लगानीया सिद्धान्त हःगु खः । थ्व सिद्धान्त कथं लँय् सुयागु जग्गा लाइगु खः, व जग्गा अधिकरण यानाः कायेगु व वयात मेथाय् लँय् हे लाःगु जग्गा क्षतिपूर्ति बीगु ज्या जुइ । तर जग्गा दलालतय्सं चक्रपथया नक्सा न्ह्यःने तयाः ‘का, छंगु जग्गा नं लँय् लाः का स्व, लँ दयेकल कि थ्व नं अधिकरण याइ’ धाधां जग्गा न्यायेगु ज्या यानाच्वंगु खँ सीदुगु दु ।

बाहिरी चक्रपथ लागाय् ७८०० रोपनी जग्गा अधिग्रहण यायेमाःगु खःसा भूमाफियातय्सं अथे अधिकरण यायेमाःगु जग्गा फुक्क हे जग्गा चिचीकू यानाः कित्ताकाट याना तयेधुंकूगु दु । भूमाफियातय्सं अन थ्यंमथ्यं ३ हजार कू जग्गा कित्ताकाट यानाः पिकयातये धुंकूगु दु । योजनाय् लायेधुंकूगु जग्गा दथुइ कित्ताकाट याये मदइगु नियम दुसां अन धाःसा धमाधम जग्गा कित्ताकाट जुयाच्वंगु दु ।