भारतीय कायेथाय् नं नेपाःया नागरिक

येँ – तराई लागाय् भारतीय नागरिकतय्सं नेपाःया नागरिकता कयाच्वन प्रचार जूसां यथार्थय् धाःसा नेपाःया पहाडी मूलया मनूतय्सं नं भारतीय नागरिकता कायेगु यानाच्वंगु खँ सूत्रं धाःगु दु । सूत्रया कथं भारतीय नागरिकयात नेपाःया नागरिकता कायेबलय् खास हे फाइदा मदु । बरु नेपाःया नागरिकतय्सं भारतीय नागरिकता कायेबलय् स्कुलय् मस्तय्त आखः ब्वंकेत, नसात्वँसा न्यायेगुली फाइदा जुइ । .

भारतीय जनतायात नेपाःया नागरिकता कयां छु दइ मखु बरु भारतीय नागरिकता दुपिंत भारतय् आपालं सुविधा बीगु जुयाः नेपाःमित उखेया नागरिकता कायेत लालायित जुइगु खँ धाःगु दु । भारतं स्कुलय् आखः ब्वंकेत थीथी कथंया सुविधा बिया वयाच्वंगु दुसा मेखे न्हिथंया निंतिं माःगु नसा ज्वलं न्यायेगु निंतिं रासन कार्ड बिया वयाच्वंगु दु ।

रासन कार्ड दुपिंसं नसा ज्वलं न्यायेबलय् तसकं दंक लाइगु जुयाः भारतीय नागरिकतय्सं नेपाःया नागरिकता कायेमाःगु मदु धासें बरु पहाडी मूलया नेपाःमितय्सं भारतीय नागरिकता कयाच्वंगु खँ धाःगु दु । नेपाःया पहाडिया मूलया नागरिकतय्सं थः मस्त भारतय् ब्वंकेगु यानाच्वंगु दुसा उमिसं रासन कार्ड नं कयातःगुलिं उमित नसा ज्वलं नं दंक लानाच्वंगु व थीथी सुविधा नं उपभोग यायेगु यानाच्वंगु खँ सूत्रं धाःगु दु ।

सरकारी तथ्यांक कथं नं तराईलय् स्वयां अप्वः नागरिकता पहाडी लागाय् इनेगु ज्या जुयाच्वंगु दु । यदि ५० लाख भारतीय नागरिकं नेपाःया नागरिकता काःगु खःसा नेपाःया जनसंख्या ३ करोड ५० लाख स्वयां अप्वः जुइमाःगु खः धासें नेपाःया जनसंख्यां हे भारतीय नागरिकं नेपाःया नागरिकता काल धायेगु आधार मदुगु खँ धाःगु दु ।