
प्रधानमन्त्री केपी ओलिं संसद भंग यात। संसद भंग याःगु ठिक जू ठिक मजू धयागु राजनीतिया ग्वःफय् दनावल । झी नेवाःत थ्व ग्वःफसय् लाःगु दु । झी नेवाःतसें छु यायेगु ?
आदिवासी नेवाःतय् मिखाकुलिं स्वेबलय्
न्हापा नं तःतःधंगु राजनीतिक ग्वःफय् दनावये धुंकूगु दु । वि.सं. २००७, २०१७, २०३६, २०४६, २०५२, २०६२ या ग्वःफय् झी नेवाःतसें भोगे यानागु दु। झी नेवाःत नेपाली कांग्रेस, एमाले, माओवादी, जुजुवादी सकतां जुइधुन । उमिगु झोला क्वबियाः उमि ल्यूल्यू नं तःक्वमछिं वने धुन । इमान्दार, बफादार जुयाः निस्वार्थ भावं त्याग, तपस्या व बलिदान नं यक्व यायेधुन । कम्युनिष्ट पार्टी जन्म यानापिं झी नेवाःत, कांग्रेस पार्टी जन्मे यानापिं झी नेवाःत, जुजुया विश्वासपात्र जुयापिं नं झी नेवाःत। उलिमछिं दुःखसियाः झी आदिवासी नेवाःतय्त छु दत ?
नेवाःतय्त छु दत ?
सांस्कृतिक सम्पदां सम्पन्न, कला कौशलं जाःगु व्यवस्थित शहरी व्यवस्थापनं सम्पन्न, स्वःस्वःथाय् ख्यः व पुखुलिं जाःगु, उन्नत वैज्ञानिक जल प्रणालीं सम्पन्न, चौविसै घण्टा लः हाया च्वनीगु स्वर्ग समान सुन्दर शान्त आदिभूमि स्वनिगःयात आप्रवासन तच्वःगु, अस्तव्यस्त कोलाहलं जाःगु, प्रदूषण तच्वःगु, लःया हाहाकार जूगु नरकय् हिलाबिल । झीगु स्वनिगःयात थुलि हे मखा दत ।
तःजिगु संस्कृतिं जाःगु तजिलजिया थुवाः, साहित्य जक मखु लिपिया नं धनी, थःगु भाषा दुपिं, कलाकौशलं जाःगु सुन्दर व्यवस्थित नगर दयेकेसःपिं, आर्थिक सम्पन्नतां जाःपिं, व्यवस्थित गुथि दयेकाः सामुहिक जीवन हने सःपिं, सभ्य सुसंस्कृत समाज दुपिं झी आदिवासि नेवाःतय्त भूमिं विस्थापित, भाषां विस्थापित यानाबिल, लजगाः मदया वनाच्वंपिं, नये-त्वने मखना वनाच्वंपिं, च्वने थाय् मदया वनाच्वंपिं, तच्वःगु आप्रवाशनं यानाः तच्वकं अल्पमतय् लाःपिं, थःगु थासय् परदेशी थें जुयावनाच्वंपिं, थःगु थाय् बाय् त्वःतावने मालाच्वंपिं, थःगु म्हसिका तंका वनाच्वंपिं, थःगु अस्तित्व हे मदेका वनेत्यंपिं यानाबिल । झी आदिवासि नेवाःतय्त थुलि हे मखा दत ।
नेवाःत औपनिवेशीक शासनय् लात
झीगु स्वनिगः भज्यंक स्यंकूपिं सु? झी नेवाःतय्त दक्व ख्यलं पितिनाछ्वःपिं सु ? झी नेवाःतय् अस्तित्व संकटय् लाकूपिं सु ? झीगु भाषा न्हंके त्यंपिं सु ? थुपिं हे राष्ट्रिय राजनितिक दलत खः, जुजुवादी खः । थुपिं नेवाःविरोधी, नेपालभाषा विरोधी, स्वनिगः विरोधि खः । थुपिं षडयन्त्रकारी, जालि फताहा, भ्रष्ट, नश्लवादि ब्राम्हणवादि खः । थुमिसं झी आदिवासी नेवाःतय्त औपनिवेशिक शासन क्वचिंका तःगु दु ।
झीगु मुद्दा छु?
झी थौं सी ला कन्हय् सी ला जुयाच्वंपिं आदिवासि नेवाःतय्गु लागिं संसद विघटन वा पुनर्स्थापन मू सरोकारया विषय मखु । झीगु मू सरोकारया विषय धयागु आदिवासी नेवाः जाति गथे यानाः म्वाकेगु ? आप्रवासन गथे यानाः दिकेगु ? नेवाः आदिवासी अधिकार गथे यानाः कायेगु ? भाषिक अधिकार गथे यानाः कायेगु ? संविधानं बियातःगु स्वायत्त-क्षेत्रया अधिकार गथे यानाः कायेगु ? ख्वना व बुंगदेय् गथे यानाः बचय् यायेगु ? ग्वलः व चाबहि गथे यानाः बचय् यायेगु ? गैरन्यायिक सडक विस्तार गथे यानाः पनेगु? आदिवासि नेवाःतय् गुथियात स्वायत्तता व स्वशासन गथे याना कायेगु? कृषि-भूमि गथे यानाः संरक्षण यायेगु? धयागु खः ।
थःगु अधिकारयात कयाः न्ववायेमफुपिं नेवाः नेता छ्वयेगु खःसा उकिया उपादेयता मदु । प्रदेशया नां बागमति तयेगु झ्वलय् थःगु ख्वाःपाः क्यनेधुंकूपिं अज्याःपिं नेता झीत केन्द्रीय सदस्य जक छु, प्रधानमन्त्री हे जूसां छुं ज्या बी मखु ।अज्याःपिनिगुपाखें छुं ख्यें थ्वइगु आशा याये थाय् नं मदु ।
राजनीतिक नेवाः नेतातय्त न्ह्यसः
छिकिपिसं नेवाः मुद्दाय् गुवलें सरोकार तयागु दु ला ? नेवाः मुद्दा ज्वनाः गुबलें सडकय् कुहां वयागु दु ला ? नेवाः मुद्दाय् पार्टी पंक्ति गुवलें सडकय् क्वतहयागु दु ला ? पार्टी दुने नेवाः मुद्दा यंकादियागु दु ला ? छिकिपिं पार्टीया जक नेता खः लाकि नेवाः जनताया नं नेता खः ? नेवा जनताया नं नेता खःसा नेवाः मुद्दाय् सरोकार क्यनादीमाल । नेवाः नेता व कार्यकर्ता धयापिं स्वांमा खःसा नेवाः जनता चाथें मखुला ? नेवाः जनताप्रति छिकिपिनि जिम्मेवारी दु लाकि मदु ? आम नेवाः जनतायात आदिवासि नेवाः अधिकार धयागु प्रजातान्त्रिक अधिकार खः धका प्रशिक्षण बिइगु दायित्व प्रजातान्त्रिक पार्टीयागु मखुला ? छिकपिं हनेबःपिं नेवाः नेतापिनिगु मखुला ? नेवाःतय्त थःगु आदिवासि अधिकारया लागिं छप्पँ जुयाः आन्दोलन यायेत लँ क्यनेगु दायित्व छिकपिनिगु मखुला ? छिकिपिसं थःगु दायित्व पूवंका च्वनागु दुला ? पार्टी व नेवा जनता स्वायेगु माध्यम छिकिपिं हे मखुला ? नेवाः जनताया मुद्दायात पार्टीं भ्याः भचा हे च्यूता मकायेगु, पार्टीं आह्वान याइबलय् धाःसा हवार्र ब्वाँय् वनेमाःगु थ्व पाय्छि खःला? आदिवासि नेवाः जाति मन्तकि छिकिपिं जक म्वाना च्वनेफइला ? आशा याये आदिवासि नेवाः जाति म्वाकेत, नेपालभाषा म्वाकेत, आदिभूमि स्वनिगः बचय् यायेत छिकिपिं न्ह्यचिलादी ।
झी आदिवासि नेवाःतसें थौंतक पार्टीतय् ल्यूल्यू वनाः यानागु त्याग तपस्या व बलिदानया फल भ्रष्टाचारी, नश्लवादी, ब्राम्हणवादी नेतातसें नयाबिल । उलिजक मखु झीगु जाति, थाय्बाय् व भाय् तकनं नुनाछ्वयेगु स्वल । आः नं न्ह्यलं मचायेकेगु खःसा झी सिधइगु पक्का जुल । आः नं मिखा तिसिनाः राजनीतिक ग्वःफसय् दुहां वनाच्वनेगु खःसा आत्मघाती गोल याये थें जुल । अस्तित्व संकटय् लानाच्वंपिं आदिवासी नेवाःतय् अस्तित्व झन संकटय् लाके थें जुल । राजनीतिक दल बल्लाकेत, जुजु बल्लाकेत झीसं यक्व हिचःति हायेके धुन । आः गात। आः आदिवासि नेवाः जाति म्वाकेत छुं यायेगु ई वःगु दु ।
नेवाःशक्ति निर्माण
झी दने वा ! जिपिं आदिवासि नेवाः खः, स्वनिगः जिमिगु आदिभूमि खः, नेपालभाषा जिमिगु भाय् खः, धाये सयेके वा ! जिमिगु जाति, थाय्बाय्, भाय् सिके बिइमखु धाये फयेके वा ! आदिवासि नेवाः अधिकार काये वा ! झी न्ह्यलं चाःपिं नेवाःत छप्पँ जुइ वा ! त्वाःत्वालय्, गांगामय्, आदिवासी नेवाः जागरण अभियान न्ह्याके वा ! आदिवासी नेवाः शक्ति निर्माण याये वा !
LEAVE YOUR COMMENTS