ने. सं. ११४६ चाैलागा त्रयोदशी - थिमि बालकुमारी जात्रा

स्वनिगलय् स्कुल चायेकेगु शुरु

येँ /कोरोना महामारीया कारणं बन्द जुयाच्वंगु स्वनिगःया स्कुलत चायेकेगु धकाः थीथी नगरपालिकातय्सं निर्णय याना हःगु दु । छुं नगरपालिकां पूर्ण व गुलिसिनं आंशिक रूपं चायेकेगु निर्णय याःगु खः ।

ख्वप नगरपालिकां थःगु क्षेत्रय् लाःगु स्कुलय् कक्षा ८, ९ व १० सञ्चालन यायेगु बारे प्रस्ताव छ्वया हजि धकाः स्कुलतय्त इनाप याःगु दु । ख्वप नगरपालिकाया मेयर सुनिल प्रजापतिं ख्वप नगरपालिका दुने च्वंगु स्कुलया स्वंगू तगिं सञ्चालन यायेगु निंतिं थःपिंसं प्रस्ताव आह्वान यानागु जानकारी बियादीगु दु ।

वय्कःया कथं ख्वपया फुक्कं स्कुल सञ्चालन यायेगु मखुसें स्वास्थ्य मापदण्ड नालाः सञ्चालन यायेफइगु स्कुलया बारे जक उकथं प्रस्ताव आह्वान जूगु खः ।

‘नेपालभाषा टाइम्स’ लिसे खँ ल्हासें मेयर प्रजापतिं धयादिल, ‘स्कुल पूर्ण रुपं चायेकेगु मखु, च्वय्या तगिंया स्वंगू क्लास जक चायेकेगु कथं प्रस्ताव आह्वान यानागु खः, वनं फुक्कं क्लास छक्वलं चायेकेगु मखु । गुगुं सुथय् गुगुं न्हिनय् यानाः सामाजिक दूरी कायम जुइकथं जक प्रस्ताव आह्वान यानागु खः ।’

सामुदायिक स्कुलय् छगू हे क्लासय् सछि स्वयां अप्वः विद्यार्थी दुगुलिं उमित छक्वलं हे क्लास कायेफइगु अवस्था मदु धासें वय्कलं खाका पेश याकाः जक स्कुल चायेकेगु प्रस्ताव आह्वान यानागु खँ नं कनादिल ।

उकथं हे स्वनिगः नगरपालिका फोरमया सचिव लिसें थिमि नगरपालिकाया मेयर मदनसुन्दर श्रेष्ठं थःगु नगरपालिकाय् स्कुल चायेकेगु बारे छुं निर्णय मजूनिगु खँ कनादिल । वय्कलं धयादिल, ‘आः तक स्कुल चायेकेगु निंतिं छुं नं कथंया तयारी यानागु मदुनि । स्थिति स्वयाः निर्णय यायेगु जुइ ।’

अथे हे किपू नगरपालिकाया मेयर रमेश महर्जनं नं थःगु नगरपालिका दुने च्वंगु स्कुलया अवस्था कथं स्कुल सञ्चालन यायेगु निंतिं प्रस्ताव आह्वान यानागु जानकारी बियादिल ।

वय्कलं नं स्कुल स्वय्मं हे स्वास्थ्य मापदण्ड पालना यायेगु जिम्मेवारी काल धाःसा स्कुल सञ्चालन यायेत अनुमति बी फइगु खँ कनादीगु दु । आःया निंतिं थःपिंसं प्रस्ताव जक आह्वान यानागु खँ वय्कलं धयादिल, ‘स्वास्थ्य मापदण्ड पालना याये मफइगु अवस्थाय् स्कुल सञ्चालन याके बीगु जुइ मखु ।’

स्वनिगःया थीथी नगरपालिका मध्ये यल, चन्द्रागिरी, दक्षिणकाली, शंखरापुर, तार्केश्वर व बुढानिलकण्ठ नगरपालिकां थःपिनि क्षेत्रय् लाःगु स्कुल चायेकेत अनुमति बीधुंकूगु दु । येँ महानगरपालिकां नं स्कुल सञ्चालन यायेगु बारे सकारात्मक सोच तसें सहलह ब्याकूगु दु ।