इन्टरनेटया कर्मचारीत मनपाया नियन्त्रणय्

येँ – येँ महानगरपालिकां थीथी इन्टरनेट सेवा प्रदायक कम्पनीया कर्मचारीयात नियन्त्रणय् काःगु दु । इन्टरनेट सेवाया निंतिं लाक्वपाक्व थासं तार साला यंकेगु ज्यां सहरी सुन्दरयात कुरुप याःगु धासें येँ मनपां उकथं इन्टरनेट सेवा प्रदायक कम्पनीया कर्मचारीयात नियन्त्रणय् कयाः सचेत याकूगु खः ।

इन्टरनेट सेवाया निंतिं तार जडान यायेगु झ्वलय् मेपिनिगु तार चाना बीगु व थःगु तार जडान यायेगु, लाक्वपाक्व थासं तार साला यंकेगु ज्याः सहरयात कुरुप व जोखिम यायेगु ज्या याःगु धासें येँ मनपां स्वंगू इन्टरनेट सेवा प्रदायक कम्पनीया कर्मचारीयात नियन्त्रणय् काःगु खः । नियन्त्रणय् काःपिं कर्मचारीतय्त आवंलिं अज्याःगु ज्या मयायेगु शर्तय् रिहा याःगु खः ।

थ्व झ्वलय् वंगु छुं दिं न्ह्यः थनया येँ मनपा वडा नं. १६ स्थित बालाजु बाइपासया क्षेत्रय् उकथं इन्टरनेट सेवाया निंतिं तारया ज्या यानाच्वंपिं कर्मचारीतय्त उगु हे वडाया वडाअध्यक्ष मुकुन्द रिजालया नेतृत्वय वंगु छगू पुचलं स्वम्ह कर्मचारीतय्त नियन्त्रणय् काःगु खः । थःपिनिगु ज्या सिधयेकेगु नामय् मेपिंत लिच्वः लाइकथंया ज्या मयायेत व सहरी सुन्दरता कायम यानातयेत धासें इमित सचेत याकेगु ज्या जूगु खः ।

येँ मनपां वल्र्ड लिंक, भायोनेट व नेट म्याक्सया कर्मचारीतय्त तार जडान यानाच्वंगु अवस्थाय् नियन्त्रणय् काःगु खः । लिपा इन्टरने सर्भिस प्रोभाइडर एशोसियसन अफ नेपालया कोअर्डिनेटर विनोद जोशीया नेतृत्वय् कम्पनीया प्रतिनिधिपिं वडाय् वडाअध्यक्ष समक्ष वनाः थःपिनिगु समस्या थुइकाबीत इनाप यासें वइगु दिनय् अज्याःगु ज्या मयायेगु निंतिं थःपिं सचेत जुया वनेगु खँ धयादीगु खः ।