जेष्ठ नागरिकपिंत छेँछेँ वनाः विशेष भत्ता

येँ – कोरोना महामारीया कारणं देय् छगूलिं लकडाउनया अवस्थाय् दु । लकडाउनया इलय् सरकारं मनूतय्त अत्यावश्यक ज्याया निंतिं बाहेक मेगू ज्याया निंतिं छेँ नं पिहांमवयेत इनाप याःगु दु । थज्याःगु अवस्थाय् मचा निसें बुराबुरी तक छेँय् लानाचवंगु दु । थ्वहे झ्वलय् येँ महानगरपालिकाया वडा नम्बर १८ पाखें लकडाउनया इलय् समस्या मजुइमा धकाः जेष्ठ नागरिकतय्त छेँछँय् वना बिशेष भत्ता इनेगु ज्या याःगु दु ।

वडा नम्बर १८या अध्यक्ष न्हूच्छेकाजि महर्जन नापं जनप्रतिनिधितय् सक्रियताय् जेष्ठ नागरिकपिंत छेँछँय् वनाः विशेष भत्ता इनेगु ज्या जूगु खः । उगु इलय् जनप्रतिनिधिपिंसिं सोमवाः जेष्ठ नागरिकतय् स्वास्थ्य अवस्थाया बारे नं न्यनेकने याःगु खः । स्थानीय निकायपाखें जेष्ठ नागरिकपिंत दच्छि छक्वः विशेष भत्ता कथं झिंनिद्वः तका बीगु यानाच्वंगु दु ।