एसईई लिच्वः पिकायेगु अन्तिम तयारी

येँ (नेपालभाषा टाइम्स)÷राष्ट्रिय परीक्षा बोर्डं थ्वहे वाःया दुने एसईईया लिच्वः पिकायेगु तयारी यानाच्वंगु दु । साउनया न्हापांगु वालय् हे लिच्वः पित बीगु आज्जु तयातःगु खःसां रुजु यायेगु ज्या क्वमचाःगुलिं लिच्वः लिबाःगु खँ धाःगु दु ।

थौं तकया दुने रुजु यायेगु ज्या क्वचायेकाः बोर्डया बैठक सःतेगु तयारी जुयाच्वंगु खँ धाःगु दु । बोर्डया बैठकं रुजु व तयारीया विषय सहित थीथी कारणं रद्द यायेमाःगु परीक्षार्थीया विषयसं निर्णय काइ । वयां लिपा बोर्डया निक्वःगु बैठक च्वनाः लिच्वः पित बी ।

परीक्षा नियन्त्रक अर्जुन रायमाझीया कथं आः वइगु शुक्रवाः तकया दुने लिच्वः सार्वजनिक जुइ । थुकिया निंतिं थौंकन्हय् ७० म्ह कर्मचारी खटे जुयाच्वंगु दु ।

थुगुसी परीक्षा सार्वजनिक यायेन्ह्यः हे न्हापा थें गल्ती मजुइमा धकाः कुतः जुयाच्वंगुलिं नं छुं न्हि लिबाःगु खँ धाःगु दु । वंगु दँय् विद्यार्थीया सिम्बोल नम्बर, जन्म मिति, नां थर लगायत विषयय् आपालं त्रुटि जूगुलिं थुगुसी अज्याःगु समस्या फयांफछि मवयेकेगु कुतः जुयाच्वंगु खँ नं बोर्डं धाःगु दु ।

लिच्वलय् बिस्कं कथंया विवरण वल धाःसा उकियात भिंकेत देय्न्यंकंया विद्यार्थीत सानोथिमिया ज्याकुथी वयेमाःगु बाध्यता दुगुलिं फयांफछि अज्याःगु समस्या मवयेकेत स्वयाच्वंगु खँ धाःगु दु । बोर्डया प्रादेशिक ज्याकुथी अज्याःगु विवरण भिंकेत समस्या दुगुलिं छुं ई लिबाःसां विद्यार्थीयात दुःख मबीगु कुतः जुयाच्वंगुु दावी परीक्षा बोर्डं याःगु दु ।

वंगु एसईईया परीक्षाय् देय्न्यंकया २७०० परीक्षा केन्द्रपाखें ५ लाख १४ हजार ७६० म्ह विद्यार्थीं परीक्षा बिउगु खः । उकी मध्ये जापानया छगू परीक्षा केन्द्रपाखें नीम्ह विद्यार्थीं एसईई परीक्षा बिउगु खः । बोर्डं असार मसान्त दुने लिच्वः पिकायेगु ताः तयातःगु खःसा स्थानीय तहया निर्वाचन, खुसिबाः व चलःया कारणं छुं ई लिबाःगु खँ नं धाःगु दु ।

थुगु दँनिसें न्हूगु लेटर ग्रेडिङ पद्धति कथं एसईई लिसें कक्षा ११ व १२ या लिच्वः सार्वजनिक यायेगु तयारी जुयाच्वंगु दु । लेटर गे्रडिङ निर्देशिका २०७८ कथं गुगुं नं विषयया परीक्षाय् म्होतिं नं ३५ प्रतिशत अंक हये मफुत धाःसा च्वय्या कक्षाय् ब्वने दइ मखु ।

सम्बन्धित बुखँ

LEAVE YOUR COMMENTS