म्हिगः खोनाया सुनुवाई मजुल

येँ – फास्ट ट्राय्क विरुद्ध अन्तरिम आदेश यासें दत्या न्ह्यः दायर याःगु मुद्दाया सुनुवाई म्हिगः जुइ धाःसां जुइ मफुत । मुद्दाय् बहस यायेगु निंतिं तयारी जुयाच्वंगु खःसां सर्वोच्च अदालतं ई बी मफयेवं मुद्दा स्थगित जूगु खँ आदिवासी जनजाति वकिलतय् संस्था लाहुर्निपया महासचिव शंकर लिम्बुं ‘नेपालभाषा टाइम्स’ यात कनादिल । मेगु बहस वइगु पुस १३ गते जुइ धाःगु दु ।

थ्वहे झ्वलय् फास्ट ट्रायक विरुद्ध खोनाय् जुयाच्वंगु आन्दोलनयात प्रधानमन्त्री केपी ओलीं साम्प्रदायिक आन्दोलन धाःगु खँय् नं लिम्बुं खेद प्वंकादीगु दु । ‘द्वलंद्वःदँ न्ह्यवंनिसें न्ह्यानाच्वंगु परम्परा व संस्कृतियात न्हंकेगु सरकारी योजनाया विरोधय् स्थानीय जनतां याःगु आन्दोलनयात साम्प्रदायिक खनीगु प्रमया दृष्टिदोष खः’ वय्कलं धयादिल ।

लिसें वय्कलं प्रधानमन्त्रीया अभिव्यक्तियात कयाः नेवाःतय्गु छुं हे खलः पुचलं प्रतिक्रिया मबिउगु खँय् धाःसा आश्चर्य प्वंकादिल ।
वय्कलं धयादी, ‘नेपाःन्यंकं नेवाःतय् उलिमछि संघ संस्था दु, तर बुंग व खोनाया जनतायात विस्थापित यायेगु व अनया संस्कृति न्हंकेगु कथं सरकारं दयेकाच्वंगु फास्ट ट्राय्क विरुद्ध अनया जनतां यानाच्वंगु विरोधयात प्रधानमन्त्रीं साम्प्रदायिक खंकलं नं नेवाःतय् छगू हे संस्थां न्वमवाः, गज्याःगु विडम्बना ?’