शिक्षा आयोगया रिपोर्ट छापे याःगु संस्थायात कारवाही
येँ- शिक्षा आयोगं तयार याःगु रिपोर्ट छापे यात धकाः छापे याःगु संस्थायात सरकारं कारवाही याःगु दु । शिक्षा आयोगया रिपोर्ट सरकारं सार्वजनिक मयासेंलि आयोगया हे पदाधिकारीतय्गु स्वीकृति कयाः ‘शिक्षाका लागि राष्ट्रिय अभियान नेपाल’ नांगु संस्थां प्रकाशन याःगु खः । तर सरकारयात मयःगु रिपोर्ट प्रकाशन याःगु कारणं शिक्षा मन्त्रालयं उगु संस्था हे खारेज यायेगु तकया पलाः न्ह्याकूगु खँ सीदुगु दु ।
मन्त्रालयं कारवाहीया लागिं त्वह धाःसा सरकारी लोगो प्रयोग याःगु व प्रतिलिपि अधिकार उल्लंघन याःगु धकाः द्वपं बिउगु दु ।
तर शिक्षा आयोगया संयोजक श्याम श्रेष्ठं धाःसा आयोगया रिपोर्टय् सरकारी लोगो मदुगु व उगु रिपोर्ट प्रधानमन्त्रीयात लःल्हाःबलय् शिक्षा मन्त्रालयया कर्मचारीतय्सं हे थःपिंसं यानागु ज्या धकाः क्यनेगु लागिं सरकारी लोगो तया बिउगु खँ कनादीगु दु । आयोगपाखें मन्त्रालययात रिपोर्ट पेश याःगु व मन्त्रालयं प्रधानमन्त्रीयात रिपोर्ट बिउबलय् उमिसं हे अनावश्यक रुपं उकी सरकारी लोगो तःगु जुयाः थ्व लोगो तःम्ह कर्मचारीयात कारवाही यायेमाःगु माग नं भाजु श्रेष्ठं यानादिल ।
५०० पेज दुगु उगु रिपोर्ट प्रकाशन यात धकाः सरकारं प्रकाशन संस्थालिसे मन्त्रालयया स्वापू त्वाःथलेगु लिसें दर्ता खारेज यायेत गृह मन्त्रालययात पौ समेत च्वया छ्वयेधुंकूगु दु । आः गृहं नं पौ कथं उगु संस्थाया दर्ता खारेज यायेगु प्रक्रिया न्ह्याकूगु दु । उगु संस्थालिसे सुं नं अन्तर्राष्ट्रिय संस्थां स्वापू तये मते धकाः नं आह्वान यायेधुंकूगु दु ।
संयोजक श्याम श्रेष्ठया कथं उगु रिपोर्ट तयार याःगु संस्था ‘राष्ट्रिय शिक्षा आयोग’ छगू स्वतन्त्र संस्था जूगु कारणं वयागु प्रतिवेदनय् सरकारी लोगो तयेमाःगु आवश्यकता मदु । तर मन्त्रालयया कर्मचारीतय्सं हे प्रधानमन्त्रीयात लःल्हाःगु रिपोर्टय् सरकारी लोगो तःगु जुयाः दकलय् न्हापां वहे सरकारी लोगोया दुरुपयोग जूगु दु । प्रमाणया लागिं प्रम ओलीयाके उगु प्रतिवेदन अझं दनिगु व थःपिंके उकिया पीडीएफ कपी नं दुगु दावी भाजु श्रेष्ठं यानादिल ।
रिपोर्ट प्रकाशन यानाः जनतायात जानकारी बीगु उद्देश्य तःगु संस्थायात कारवाही यायेगु सरकारी पलाःया विरोध यासें आयोगया पुलांपिं दुजःपिंसं म्हिगः छगू मंकाः वक्तव्य नं जारी याःगु दु ।
आयोगं २०७५ माघ १ गते सरकारयात उगु रिपोर्ट लःल्हाःगु खः तर सरकारं उकियात सार्वजनिक मयासे तयातःगु खः । भाजु श्रेष्ठया कथं नेपालय् आः तक थीथी विषयया लागिं मुक्कं च्यागू आयोग गठन जूगु दुसा थ्व छगू बाहेक मेगु फुक्क हे आयोगया रिपोर्ट सार्वजनिक जूगु दु ।
LEAVE YOUR COMMENTS