लाश ल्ह्यःपिंत प्यखेरं बधाई

ख्वप – कोरोना ल्वचं कयाः सीम्ह नेपाःया न्हापांम्ह विरामीया सीम्ह ल्ह्ययेगु ज्याय् साहसपूर्वक सक्रिय जुयादीपिं ख्वपया प्यम्ह ल्याय्म्हत सकस्यां बधाईया पात्र जूगु दुसा सामाजिक सञ्जालय् वयकःपिंत भिंतुना बीपिं ग्वाःग्वाः हे खने दयावःगु दु ।

कोराना ल्वचं कयाः धौख्यः अस्पतालय् सीम्ह २९ दँया साबित्री चालिसेया सीम्ह पशुपति तक यंकेगु लागिं स्वयम् धौख्यः अस्पतालया एम्बुलेन्स तकं तयार मजुइवं सीम्ह ल्ह्ययेत समेत समस्या पिहां वःगु खः । वयां लिपा मेमेगु एम्बुलेन्स व शववाहनतय्त खबर यातं नं सुं हे तयार मजू ।

अज्याःगु इलय् कोरोनां कःपिं विरामीतय् ग्वाहालिया लागिं सक्रिय जुयाच्वंपिं थ्व प्यम्ह ल्याय्म्हतय्त प्रहरीं लुमंकल । उमिसं म्हाः मधासे धौख्यः अस्पतालं निसें ख्वप अस्पतालया एम्बुलेन्सय् तयाः लाशयात अन्तिम संस्कारया लागिं पशुपतिया विद्युतीय शवदाहगृहय् तक थ्यंकाबिल ।

थ्व ज्याय् थःहे न्ह्यचियादीपिं ख्वपया अरूण सैंजु, पुनम कर्माचार्य, न्हुजः किजु व राजेश गाइजु खः । वयकःपिंसं कोरोनां कयाः सीपिं मनूतय् लाश व्यवस्थापन यायेगु लागिं दयेकातःगु कार्यविधिया पूर्ण पालना यासें उगु ज्या यानादीगु खः ।

ख्वपया ल्यायम्हतय् थ्व पुचः वंगु निला न्ह्यवंनिसें कोरोना विरुद्धया अभियानय् सक्रिय जुयाच्वंगु दु । वयकःपिं छुं नं सरकारी निकायलिसे आवद्धपिं मखु । थ्व अभियानय् वयकःपिं स्वयंसेवक जुयाः सक्रिय जुया च्वनादीगु खः ।

सुं हे एम्बुलेन्सं माने मजूसां वयकःपिंसं साहस यानाः लाश ल्ह्ययेगु ज्या यानादीगुलिं वयकःपिंत थीथी संस्थापाखें बधाई बिउगु दुसा सामाजिक सञ्जालय् नं वयकःपिं गाक्कं चर्चित जुयादीगु दु ।