ने. सं. ११४४ ञलाथ्व नवमी -

आईजीपी धीरजप्रतापया मुद्दा ‘हेर्दाहेर्दै’

येँ – धीरजप्रताप सिंहयात आईजीपीइ बढुवा याःगु मन्त्रिपरिषदया निर्णय विरुद्धया एआईजीपी विश्वराज पोखरेलं तयादीगु रिटया सुनुवाइ ‘हेर्दा हेर्दै’ तःगु दु । न्यायाधीश सुष्मलता माथेमाया इजलासं म्हिगः उगु मुद्दायात हेर्दा हेर्दैलय् तःगु खः ।

एआईजीपी पोखरेलं सिंहयात आईजीपीइ बढुवा यायेगु मन्त्रिपरिषदया निर्णय बदर यायेमाःगु माग तयाः वंगु सोमवाः सर्वोच्च अदालतय् रिट दायर याःगु खः । एआईजीपी पोखरेलं दायर याःगु रिटय् बढुवाया निर्णय यथास्थितिइ तयेत व अदालतं न्याय निरुपण मजू तक थःत कायम मुकायम महानिरीक्षकया रुपय् ज्या याकेबीमाःगु माग दाबी याःगु खः ।

उकथं हे रिटय् पोखरेलं जेष्ठता, कार्यसम्पादन मूल्यांकन, शैक्षिक योग्यता, तालिम, पुरस्कार, कमाण्ड लगायत फुक्कं आधारय् थः न्ह्यःने दुगु धासें मन्त्रिपरिषदया निर्णय बदर यायेमाःगु माग याःगु खः ।

थ्वहे झ्वलय् राष्ट्रिय मानव अधिकार आयोगया दुजः मिहिर थाकुरं सरकारं मानव अधिकार उल्लंघनकर्ताया द्वपं फयाच्वंम्हेसित प्रहरी महानिरीक्षक नियुक्ति याःगु द्वपं बिउगु दु । म्हिगः आयोगया ज्याकुथी पत्रकार सम्मेलन झ्वलय् दुजः थाकुरं न्हू नियुक्त जुयादीम्ह आईजीपी धिरजप्रताप सिहंयात मानव अधिकरा उल्लंघनकर्ताया द्वपं लानाच्वंगु खँ कनादीगु खः ।

ठाकुरं मानव अधिकार उल्लंघन याम्हेसित आईजीपी नियुक्त यानाः सरकारं राज्यसत्ताया दुरुपयाग याःगु खँ नं धयादीगु दु । आईजीपी सिंहयात कयाः आयोगं अनुसन्धान यानाच्वंगु धासें सिंहयात कयाः थप अनुसन्धान न्ह्याकेत नं वय्कलं सरोकारवाला फुकसित इनाप यानादीगु दु ।