बुद्ध नेपालय् बूगु खँय् विवाद मदु : भारतीय विदेश मन्त्रालय

येँ (नेपालभाषा टाइम्स) – भारतया विदेश मन्त्रालयं भारत नेपालय् बूगु खँय् छुं विवाद मदु धाःगु दु। म्हिगः भारतीय विदेश मन्त्रालयय् जूगु नियमित पत्रकार सम्मेलनय् बुद्ध नेपालय् बूगु खँय् छुं विवाद मदु धाःगु खः ।

भारतीय विदेश मन्त्री एस जयशंकरं धयादीगु खँ बौद्ध सम्पदायात कयाः धाःगु,गौतम बुद्धया जन्मयात कयाः धाःगु मखु धकाः विदेश मन्त्रालयं धाःगु दु। भारतीय विदेशमन्त्री जयशंकरं शनिवाः कन्फडरेशन अफ इन्डियन इन्डस्ट्रिं ग्वसाः ग्वःगु भर्चुअल सम्मेलनय् संवोधन यायेगु झ्वलय् बुद्धयात महान भारतीय नागरिक धकाः धयादीगु खः । थ्व लिपा नेपालय् थुकिया तच्वःगु विरोध जूगु खः ।

नेपाःया परराष्ट्र मन्त्रालयं भारतीय विदेशमन्त्रीया धापूया खण्डन यासें बुद्धया जन्मभूमियात कयाः राष्ट्रिय व अन्तर्राष्ट्रियस्तरय् छुं कथंया बहस व विवाद यानाच्वनेम्वाःगु खँ धाःगु दु । परराष्ट्र मन्त्रालयं म्हिगः छगू वक्तव्य पितबिसें ‘भगवान बुद्ध नेपाःया लुम्बिनीइ बूगु धयागु ऐतिहासिक व पुरातात्विक प्रमाणया आधारय् पूर्ण रुपं स्थापित व अकाट्य तथ्य खः । बुद्धया जन्मस्थल व बुद्ध धर्मया प्रादूर्भाव जूगु थाय् लुम्बिनीयात युनेस्कों हे विश्व सम्पदास्थल धयातयेधुंकूगुलिं थ्व खँ छुं बहस यानाच्वनेगु आवश्यक मदु’ धयादीगु खः ।

प्रधानमन्त्री केपी ओलीं रामया जन्मभूमि भारतया अयोध्या मखु, नेपाःया चितवनय् लाःगु ठोरीइ खः धकाः धायेवं निगू देय् दथुइ राम व बुद्धया जन्मभूमियात कयाः वाक्युद्ध धयाथें सुरु जूगु खः । थ्व हे झ्वलय् भारतीय विदेशमन्त्री एस जयशंकरं शनिवाः बुद्ध भारतय् बूगु धयागु कथंया अभिव्यक्ति बिउगु खः ।

मेखे नेपाःया प्रधानमन्त्री ओलीं नं शनिवाः हे रामया जन्मभूमि चितवनया ठोरी हे जूगुलिं अन रामया भव्य देगः दनेत उजं बियादीगु खः । चितवनया ठोरी लाःगु वडाया अध्यक्षयात फोन यानाः हे बालुवाटार सःताः प्रधानमन्त्री ओलीं रामया भव्य देगः दनेत माःगु ज्या यायेत निर्देशन बिउगु खः ।