सीम्ह ल्हाकेथाय् फुटसल

ख्वप (नेपालभाषा टाइम्स)÷ ख्वपया दशनामी सन्यासीतय् सीम्ह ल्हाकेगु ख्वप नगरपालिकास्थित हनुमानघाटय् काठमाडौं उपत्यका विकास प्राधिकरणं दयेकाच्वंगु संरचनायात कयाः विवाद ब्वलंगु दु ।

वंगु मंगलवाः मदुम्ह छम्ह वृद्धया सीम्ह ल्हाकेत यंकूगु इलय् अन सीम्ह ल्हाकेगु थासय् हे प्राधिकरणं छेँया संरचना दयेकाच्वंगु खंकूगु खः । उकुन्हु अन छझाः विवाद नं जुल । तर मनू सीगु दुःया ई जूगुलिं सीम्ह ल्हाकाः थःथथितिपिं लिहां वल ।

उपत्यका विकास प्राधिकरणं उगु जग्गाय फुटसल, भलिबल, व्यायाम यायेगु थाय् व पार्क दयेकेत मास्टर प्लान हे तयार यानाः ज्या न्ह्याकाच्वंगु खः । तर दशनामी समाजया समाधिस्थलय् अज्याःगु संरचना दयेकूगु खँयात कयाः दशनामी समाजया समाधिस्थल व्यवस्थापन समिति हनुमानघाटं प्राधिकरण विरुद्ध मुद्दा नं तःगु खः ।

उगु मुद्दाय् फैसला यायेगु झ्वलय् २०७० सालय् अदालतं समाधिस्थलय् छुं नं कथंया संरचना मदयेकेत आदेश बिउगु खः ।