बेनीइ छगू दशक लिपा नागिनी सुचुकेगु प्याखं

येँ(नेपालभाषा टाइम्स)- नेपालभाषा मंकाः खलः बेनी व ल्याय्म्ह पुचःया मंकाः सक्रियताय् म्याग्दीया बेनीइ नागिनी सुचुकेगु प्याखं शुरु जूगु दु । मंकाः खलः व ल्याय्म्ह पुचःया ग्वसालय् छगू दशक लिपा थुगु प्याखं क्यंगु खः ।

ल्याय्म्ह पुचःया पुलांम्ह नायः सुविन श्रेष्ठं गुंपुन्हि व सापारुया झ्वलय् लाकाः छगू दशक लिपा थुगु प्याखं क्यनेगु ज्या जूगु जानकारी बियादिल । ‘बेनीइ नागानागिनी प्याखं दँय्दसं क्यनेगु याना वयाच्वंगु दुसा नागिनी सुचुकेगु प्याखं छगू दशक लिपा क्यनेगु ज्या जूगु खः’, वय्कलं धयादिल, ‘नागिनी सुचुकेधुंकाः नागां क्यनीगु चरित्र पिब्वयेकथंया प्याखं धाःसा छगू दशक लिपा थुगुसी क्यंगु खः ।’

निम्ह कलाकार आवश्यक जुइगु नागानागिनी प्याखं न्हू पुस्तां थुकिया महत्व थुइकेमाः, सयेके सीके याये फयेमा धइगु ल्याखं थुगुसी प्याखं क्यनागु वय्कलं कनादिल । प्याखं हुलीपिं निम्हं मिजं खःसा उकीमध्ये छम्हेसिनं मिसाया वसः पुनः अभिनय याइ । गुंपुन्हि व सापारुया दिनय् थ्व प्याखं दछिया दुने दिवंगत जूपिं स्थानीय नेवाःतय् छेँ न्ह्यःने नेवाः म्येँ हालाः क्यनेगु याइ ।

थुगु प्याखनं पारिवारिक विश्वासया सन्देश बीगु खँ कनादिसें बेनीया स्थानीय संस्कृतिकःमि प्रकाशकुमार श्रेष्ठं धयादी, ‘निम्ह तिपूया दथुइ विश्वास दत धाःसा परिवार नं सफल जुइ धइगु सन्देश थुगु प्याखनं बीगु कुतः याइ ।’

बेनीया नेवाः संस्कृतिमध्ये बर्खे प्याखं अन्तर्गत दँय्दसं नागपञ्चमि दिंनिसें न्ह्याइगु थुगु प्याखं चथाः जःखः तक बेनी बजारया थीथी थासय् क्यनेगु याइ ।
परापूर्वकालयउ् समाजयात दुःख, कष्ट बिउगु व समाजय् विकृति न्यंकूम्ह गथांमुगः नांया राक्षसयात स्यायेधुंकाः वया कलातं फयेमाःगु वियोगकथं थुगु प्याखं क्यनेगु याना वयाच्वंगु श्रेष्ठं कनादिल ।