नगदेशय् बौद्ध चैत्य अनावरण

थिमि – नगदेश बुद्ध विहारय् विहारया उपासक रत्नबहादुर बाडेया सक्रियाताय् पलिस्था याःगु चैत्यया अनावरण याःगु दु। अखिल नेपाल भिक्षु महासंघया अध्यक्ष श्रद्धेय भिक्षु मैत्री महास्थविरं अनावरण याना बिज्याःगु खः ।

वसपोलपाखें पंचशील ग्रहण यासे बुद्ध पुजा यानाः न्ह्याःगु ज्याझ्वलय् विहारया उपासकलिसें मध्यपुर थिमि नगरपालिका वडा नं. ७या वडा अध्यक्ष कृष्णकुमार प्रजापतिं लसकुस यासें आवंलि उगु थाय्यात चैत्य मार्ग धायेगु व नगदेशयात ऐतिहासिक व सांस्कृतिक महत्व बीकथं नागदेश नामाकरण यानायंकेगु धयादिल ।

मूपाहां नापं भिक्षु महासंघया नायः श्रद्धेय भिक्षु मैत्री महास्थविरं नां जक न्यनातयागु नागदेशय् न्हापांखुसी उपस्थित जुयाः चैत्यतकं उलेज्या यायेखंगुलिं लसता प्वंका बिज्यात ।

नगर उपप्रमुख अञ्जनादेवी मधिकःमिं झिंन्हय्लाया दुने बृहत चैत्य निर्माणया ज्या क्वचायेकूगु लसताय् भिंतुनालिसे ज्या न्ह्याकादीपिंत सुभाय् देछानादिल ।

ज्याझ्वःया विशेष पाहां नापं नगरप्रमुख मदनसुन्दर श्रेष्ठं चैत्य स्थापना जूगु थाय्या सुन्दरता अझ अप्वयेकेत गुरुयोजना हे दयेकाः नगरपालिकापाखें योजना तर्जुमा यायेगु जुइ धयादिल ।