केशचन्द्र बाजं खलःया त्यःछिंत्यः फ्वनेज्या

येँ- केशचन्द्र गुंला बाजं खलः, इतुंबहाःया ग्वसालय् थुगुसी थिंलाथ्व पुन्हि (यःमरि पुन्हि)या लसताय् त्यःछिंत्यः फ्वनेगु ज्या जुल । खलःपाखें गुलांबाजं (धाःबाजं) व नाय्खिंलिसें थीथी थासय् वनाः त्यःछिंत्यः फ्वनेगु ज्या याःगु खः ।

यःमरि पुन्हिया लसताय् त्यःछिंत्यः फ्वनेगु नेवाःतय्गु पुलांगु चलन खःसां थौंकन्हय् न्हू पुस्ता थ्व प्रचलनयात ल्वःमंकेधुंकूगु व यःमरि पुन्हिकुन्ह त्यःछिंत्यः खँय् नं उलि चिउताः मतयाच्वंगु अवस्थाय् न्हू पुस्तायात झीगु संस्कृति व प्रचलन बारे जानकारी बीगु ल्याखं उकथं त्यःछिंत्यः फ्वनेगु ज्या जूगु खलकं जानकारी बिउगु दु ।

खलःया ग्वसालय् यःमरि पुन्हिया लसताय् थुकथं न्हापांखुसी त्यःछिंत्यः फ्वनेगु ज्या जूगु खःसा उगु पुचः मरुइ थ्यंगु इलय् स्थानीयतय्सं खादा क्वखायेकाः लसकुस याःगु खः । गुलां बाजं खलःया आपालं ल्याय्म्हत नापं नेपालभाषाया नांजाःपिं संगीतकःमिपिं सरस्वति मानन्धर, गंगा महर्जन, राजेन्द्र शाक्य, म्येँ च्वमि अमृतरत्न शाक्य लगायतं उगु ज्याझ्वलय् ब्वति कयादीगु खः ।

इतुंबहालय् मुनाः न्ह्याःगु त्यःछिंत्यः फ्वनेगु ज्या न्यत, थाय्मदु, असं, वंघः, न्हूसतक, बसन्तपू, हनुमानध्वाखा, किलागः जुयाः इतुंबहालय् तुं थ्यंकाः क्वचायेकूगु खः ।

सम्बन्धित बुखँ

LEAVE YOUR COMMENTS