येँय् एमसीसी विरोधी बन्द प्रभावहिन

येँ -नेपाःया संसदं एमसीसी पारित याःगु विरुद्ध नेत्र विक्रम चन्द विप्लवपाखें याःगु नेपाल बन्दया ज्याझ्वः प्रभावहिन जुल । उकुन्हु तक एमसीसी विरुद्ध न्हिंन्हिं ल्वापुख्यापु जुइक प्रदर्शन जुयाच्वंगु येँय् नेपाल बन्दया प्रभावत धाःसा लाःगु खने मंत ।

बन्द आह्वानकतातय्सं स्वनिगःया थीथी थासय् नक्कली बम तयाः नेपाल बन्द सफल यायेगु कुतः याःगु खःसां उकिया लिच्वः धाःसा लाःगु खने मंत । येँया न्हू बानेश्वरया लँ दथुइ प्रेसर कुकर छगः तयातःगु खनाः छझा अन आतंकया स्थिति ब्वलंगु खः । मोटरसाइकलय् वःपिंसं अन उगु प्रेसर कुकर तयाः बिसिउँ वंगु खः । तर उकी छुं धाःसा मदुगु जुयाच्वन ।

उकथं हे भ्वतया बजारय् नं छगः प्रेसर कुकर तयातःगु खःसा उकियात लिपा सेनां निष्क्रिय यायेवं यातायात सुचारु जूगु खः । अन प्रेसर कुकर तःपिंत म्हिगः हे ज्वंगु दु । प्रेसर कुकर तयाः बिसिउँ वंपिंत सिसिटिभिया फुटेजया ग्वाहालिं ज्वंगु खः । उमिसं छ्यःगु बागमति प्रदेश ०२–०२७ प ८७७४ नम्बरया मोटरसाइकल सहित उमित प्रहरीं ज्वंगु खः ।

उकथं हे बन्दकर्तातय्सं येँया सुकेधाराय् दुरु ज्वना वःगु छगः गाडी तोडफोड याःगु दुसा चाबही व कलंकीइ नं स्वंगः बस तोडफोड यानाबिउगु दु । येँनं प्रहरीं खुम्हेसित ज्वंगु दु ।
बन्दया झ्वलय् कर्णाली प्रदेशया राजधानी वीरेन्द्रनगर धाःसा तनावग्रस्त जूगु दु । नेपाल बन्दया झ्वलय् अन आन्दोलनकारी व प्रहरी दथुइ ल्वापु जूगु खः । थ्व झ्वलय् प्रहरीं च्याम्ह आन्दोलनकारीतय्त ज्वंगु दु । बन्दकर्तातय्त नियन्त्रण यायेगु झ्वलय् प्रहरीं निगू दर्जन स्वयां अप्वः टियर ग्यास नं कयेकूगु खः ।