मिसा खलःया ३६ दँ बुन्हि हन

येँ(नेपालभाषा टाइम्स)/ नेपालभाषा मिसा खलकं थःगु ३६ क्वःगु बुन्हि हंगु दु । वंगु गुंलागा अस्तमि, कृष्णजन्माष्टमि कुन्हु जगतसुन्दर ब्वनेकुथिइ छगू ज्याझ्वःया दथुइ मिसा खलकं बुन्हि हंगु खः । बुन्हि हना ज्याझ्वलय् थीथी व्यक्तिपिंत हनेगु नापं थीथी सिरपाः नं लःल्हाःगु खः ।
ज्याझ्वलय् मूपाहां कथं झायादीम्ह नेपाल वज्रयान महाविहार, लुम्बिनीया चक्रेश्वर प्रा. डा. नरेशमान वज्राचार्यं खलःया लोगोय् खादा क्वखायेकाः त्वाःदेवाय् मत च्याकाः ज्याझ्वःया उलेज्या यानादीगु खः ।
ज्याझ्वलय् नेपालभाषा साहित्य ख्यःयायात तब्याकेगु ज्याय् योगदान बियादीम्ह वरिष्ठ समालोचकलिसें छधाःप्याखं च्वमि पुष्पबहादुर चित्रकारयात विशेष हनेज्या याःगु खः । अथे हे ज्याझ्वलय् खलःया थँजिपिं आजीवन दुजःपिं मय्‌जु मैयाँ तुलाधर, मय्‌जु विजया सिंह डंगोल, मय्‌जु अमीरकुमारी शाक्ययात नं हनेज्या याःगु खः । सम्मानित जुयादीपिं वय्‌कःपिंत मिसा खलःया नायः धर्मशोभा तुलाधरं स्वांमाः क्वखायेकादीगु खःसा मूपाहां प्रा. डा. वज्राचार्यं पलिगां न्ययेकाः हनापौ देछानादीगु खः ।
उगु हे ज्याझ्वलय् नेपालभाषा साहित्य ख्यःया नांजाःम्ह आख्यानकार मथुरा साय्‌मिं थः मदुपिं जहान रमा व डा. कौशल्याया नामं नीस्वनादीगु ‘रमा–कौशल्या नेवाः हना सिरपाः’ नं लःल्हाःगु खः । थुगुसी उगु सिरपाः नेपाःया नांजाःम्ह गाइनोकोलोजिष्ट प्रा. डा. सानुमैयाँ दलीयात लःल्हाःगु खः । प्रा.डा. दलीयात मूपाहांपाखें पलिंगां न्ययेकाः हनापौ देछानादीगु खःसा दाता आख्यानकार साय्‌मिं दां लःल्हानादीगु खः । थुगु सिरपाः आख्यानकार साय्‌मिं दँय् छम्ह चिकित्सक व मेगु दँय् स्वास्थ्य परिचारिका (नर्स)यात लःल्हाये कथं नीस्वनादीगु खः ।
थुकथं हे नेपालभाषा ख्यलय् योगदान बियादीपिं मिसा च्वमिपिंत लःल्हाइगु मञ्चुका स्मृति अक्षय कोषपाखें ‘कमला लुमिन नेपालभाषा सिरपाः’ बाखं च्वमि मय्‌जु दिव्या ताम्राकारयात लःल्हाःगु खः । वय्‌कःयात दाता लुमिनकुमारं दां लःल्हानादीगु खः ।
ज्याझ्वलय् मूपाहां प्रा.डा. वज्राचार्य, सम्मानित व्यक्तित्व वरिष्ठ समालोचक चित्रकार, पुरस्कृति व्यक्तित्व प्रा.डा. दली, सिरपाःया दाता आख्यानकार साय्‌मि, राष्ट्रिय आदिवासी जनजाति महिला महासंघया नायः निमि शेर्पा, खलःया निवर्तमान नायः मंगला कारंजित, संरंक्षक सुवर्णकेशरी चित्रकार लगायतं थःथःगु नुगःखँ तयादीगु खः । खलःया नायः धर्मशोभा तुलाधरया सभापतित्वय् जूगु ज्याझ्वलय् छ्याञ्जे प्रेमहिरा तुलाधरं लसकुस यानादीगु खः ।

नेपालभाषा टाइम्स

च्वमिया मेमेगु

• देेउवायात सेना पाखें रेस्क्यु ।
• उपप्रधानमन्त्री प्रकाशमान सिंहया चाक्सिबारीया छेँय् नं ताडफाेड यानाः च्याकाबिल
• प्रधानसेनापति अशाेक सिग्देलं ५ बजे सम्वाेधन याइगु धाःसां थुकिया पुष्टि जूगु मदुनि । सेनां थ्व सम्बन्धय् आःतक छुं न्ववाःगु मदुनि । बरु सेना सहित फुक्क सुरक्षा अंगया प्रमुखपिं व मुख्य सचिव एकनारायण अर्यालं छगू वक्तव्य पिकयाः संवादया माध्यमं समस्या ज्यंकेमाः धाःगु दु ।
• झलनाथ खनालया कलाः रविलक्ष्मी चित्रकारयात म्हय् मि तयाबिउगु समाचार वःगु दु ।
• पुलांम्ह राष्ट्रपति विद्यादेवी भण्डारीया छेँय् नं मि तयाबिउगु दु ।