थाय् बिल धाःसा शंखधरया अझ भव्य झ्वाःता तये

येँ (नेपालभाषा टाइम्स) – येँ महानगरपालिकाया मेयर विद्यासुन्दर शाक्यं राष्ट्रिय विभूति शंखधर साख्वाःया झ्वाःताः तयेगु थाय् बिल धाःसा महानगरपालिकां अझ भव्यं रुपं झ्वाताः पलिस्था यायेगु खँ धयादीगु दु ।

रत्नपार्कय् शंखधर साख्वाः व पद्मरत्न तुलाधरया झ्वाःताः तयाः उगु थाय्या नां शंखधर पार्क तल धकाः राप्रपा नेता कमल थापालिसें राजावादीतय्सं याना वयाच्वंगु विरोधयात लिसः बीकथं वय्कलं थ्व खँ धयादीगु खः । थापां जुजु महेन्द्रया कलाः रत्नया नामं तयातःगु रत्नपार्कया नां स्यंकल धकाः विरोध यानाच्वंगु खःसा छथ्वः राप्रपाया नेतातय्सं म्हिगः येँ महानगरपालिकाय् वनाः रत्नपार्कया नां हिउगु विरोध प्वंकुसें ज्ञापनपत्र लःल्हाःगु खः । तर रत्नपार्कया नां म्हीग शालिक तयेधुंकाः हिउगु मखुसे निदँ न्ह्यव हे संघीय सरकारं हे नां हिलाः शंखधर पार्क धकाः तयेधुंकूगु खः ।

म्हिगः शंखधर दिवसया लसताय् येँया लखुतीर्थय् जूगु ज्याझ्वलय् न्ववानादिसें मेयर शाक्यं धयादिल, ‘शनिवाः शंखधर पार्कय् साख्वाः व पद्मरत्न तुलाधरया शालिक तयागु खँय् सुं सुं मनूतय्सं गुनासो यानाच्वंगु खनेदत । शंखधरया झ्वाताः अन मतसे मेथाय् तःसां जिउ धकाः नं धयाच्वन । यदि सुनां अज्याःगु थाय् बिल धाःसा महानगरपालिकां अन नं भव्य रुपं शंखधर साख्वाया सालिक पलिस्था यानाबीगु जुइ ।’

नेपाल संवत् न्हूदँ राष्ट्रिय समारोह समिति ११४१ या ग्वसालय् समितिया नायः रमेश महर्जनया सभापतित्वय् ज्याझ्वः जूगु खः ।

सम्बन्धित बुखँ

LEAVE YOUR COMMENTS